مسجد اقصیٰ پر اسرائیلی افواج کا حملہ، چیئرمین سینیٹ کا عالمی سربراہان پارلیمنٹ سے نوٹس لینے کا مطالبہ

تفصیلات کے مطابق  چیئرمین سینیٹ صادق سنجرانی نے مسجد اقصیٰ پراسرائیلی افواج کے ‏حملےپرعالمی سربراہان پارلیمنٹ سےنوٹس لینے کا مطالبہ‎ کردیا ہے۔ چیئرمین سینیٹ صادق سنجرانی نے امریکہ، برطانیہ سمیت دیگرممالک کے ‏پارلیمانی سربراہان کوخطوط‎ ‎لکھا ہے۔چیئرمین سینیٹ صادق سنجرانی نے مسجد اقصٰی میں فلسطینی شہریوں پر ‏اسرائیلی فوجیوں کے تشدد پرتشویش کا اظہار‎ ‎کیا ہے۔

چیئرمین سینیٹ صادق سنجرانی کا خط میں کہنا ہے کہ  پاکستانی عوام کے جذبات کی ترجمانی کرتے ہوئے پارلیمنٹ کے سربراہان ‏سے مخاطب ہوں،آپ کی توجہ ماضی قریب میں مسجد اقصی میں نمازیوں پرحملے کی توجہ دلاتا ‏ہوں،‎مسجد اقصی دنیا بھرکے مسلمانوں کے لیے مقدس جگہ ہے، اس اقدام سے تمام انسانی اقداراوربین الاقوامی قانون کی دھجیاں بکھیردی گئی ‏ہیں۔

صادق سنجرانی نے خط میں مزید لکھا کہ  رمضان المبارک میں اسرائیلی افواج کا نمازیوں پرحملہ انسانی حقوق اور عالمی ‏انسانی قوانین کے خلاف ورزی ہے،مسجد اقصی میں نمازیوں پرظلم وبربریت نہ صرف قابل مذمت ہے بلکہ کسی ‏مذہب کے لیے قابل قبول نہیں ہے، سربراہان پارلیمنٹ اس ظالمانہ اقدام کی مذمت اورفلسطین میں انسانی حقوق کی ‏خلاف ورزی کی خاتمے میں اپنا کردارادا کرے۔

یاد رہے چند دن قبل  اسرائیلی پولیس کی جانب سے  مسجد اقصیٰ میں موجود نمازیوں کو عبادات سے روکا گیا تھا، جس پر احاطہ میدان جنگ میں بدل گیا اور جھڑپوں میں 170 سے زائد فلسطینی زخمی ہو گئے تھے۔ جس پر فلسطینی مظاہرین نے پولیس پر پتھراؤ اور بوتلیں پھینک کر جوابی کارروائی کی تھی۔

ماحول میں بد مزگی پھیلی تھی جب رمضان المبارک کے آخری جمعہ کے روز نماز جمعہ کے دوران اسرائیلی پولیس کی جانب سے مسجد اقصیٰ کے احاطے میں شدید فائرنگ اور شیلنگ کی گئی۔قابض اسرائیلی فوج نے مسجد اقصی میں مسلمانوں کے داخلے پر پابندی لگائی جس کے بعد مسلمانوں نے احتجاج کیا اور مسجد میں داخل ہو گئے اور نماز ادا کی تھی۔