نوازشریف کی ایون فیلڈ اور العزیزیہ ریفرنس میں اپیلیں بحال کرنے کی درخواستیں دائر

مسلم لیگ (ن) کے قائد نوازشریف نے ایون فیلڈ اورالعزیزیہ ریفرنس میں اپیلیں بحال کرنے کی درخواستیں دائر کردی ہیں، درخواستوں پر کل سماعت متوقع ہے، سابق وزیراعظم اسلام آباد ہائی کورٹ کے سامنے پیش ہوں گے۔ 

نواز شریف نے درخواستیں امجد پرویزایڈوکیٹ کے ذریعے دائر کیں، جن میں استدعا کی گئی ہے کہ اپیلوں کو بحال کرنے کے بعد دلائل سن کر میرٹ پر فیصلہ کیا جائے۔ درخواست میں موقف اختیار کیا گیا ہے کہ نواز شریف نے کبھی ضمانت کا ناجائز فائدہ نہیں اٹھایا، وہ تمام مقدمات میں ضمانت پر تھے اور متعلقہ عدالتوں کی اجازت سے بیرون ملک گئے تھے۔

درخواست میں نواز شریف نے موقف اپنایا گیا کہ اگرچہ میں ابھی تک بیماری سے مکمل طور پرریکور نہیں ہوا ، لیکن ملک کے بدترمعاشی حالات کو دیکھ واپس آنے کا فیصلہ کیا۔ صحت کی خرابی کے باعث عدالت پیش نہیں ہو سکے اور کورونا کے باعث علاج میں تاخیر ہوئی۔

واضح رہے کہ لندن میں قیام طویل ہونے پر اسلام آباد ہائیکورٹ نے جون 2021 میں نواز شریف کی اپیلیں خارج کردی تھیں، جسٹس عامر فاروق اور جسٹس محسن اختر کیانی نے عدم پیروی پر اپیلیں خارج کی تھیں۔