امریکا کی اسرائیل سے غزہ میں زمینی کارروائی کچھ عرصہ کے لئے ملتوی کرنے کی اپیل

امریکا نے اسرائیل سے غزہ میں زمینی کارروائی کچھ عرصہ کے لئے ملتوی کرنے کی درخواست کی ہے۔

نیویارک ٹائمز کی رپورٹ کے مطابق اس اقدام کا مقصد امریکا کی طرف سے مشرق وسطیٰ میں تعینات اپنے فوجیوں کو ممکنہ حملوں سے بچانے کے لئے اقدامات کے لئے وقت حاصل کرنا ہے ۔

رپورٹ کے مطابق امریکا کو حماس کے اسرائیل پر حملے میں یرغمال بنائے گئے درجنوں افراد کو چھڑانے کے لئے بھی وقت درکار ہے۔  اسرائیل کی جانب سے غزہ میں زمینی فوجی کارروائی شروع ہونے کے بعد مشرق وسطیٰ میں تعینات امریکی افواج پر حملوں کا خطرہ بڑھ سکتا ہے۔ امریکا کو شبہ ہے کہ اس طرح کے حملے ایران کے حمایت یافتہ علاقائی گروہ کر سکتے ہیں۔

غیر ملکی خبر رساں ایجنسی کے مطابق امریکی انتظامیہ کو غزہ میں انسانی ہمدردی کی بنیاد پر امداد کی ترسیل کے لئے بات چیت کی غرض سے بھی وقت درکار ہے، بائیڈن انتظامیہ اسرائیل سے جنگ بندی کا مطالبہ نہیں کر رہی ،وہ اب بھی حماس کو تباہ کرنے کے لیے زمینی کارروائی کرنے کے تل ابیب کے ارادے کی حمایت کرتی ہے۔

زمینی آپریشن کے آغاز میں تاخیر کا مشورہ امریکی وزیر دفاع لائیڈ آسٹن کے ذریعے دیا گیا تھا۔ امریکی محکمہ دفاع کے سربراہ تقریباً روزانہ اپنے اسرائیلی ہم منصب یو ایو گیلانٹ سے رابطے میں ہیں ۔ لائیڈ آسٹن نے اسرائیل کے اعلیٰ دفاعی اہلکار سے یہ بھی کہا کہ مغویوں کی واپسی امریکا کی ترجیح ہے۔دریں اثنا روسی خبر رساں ادارے کی رپورٹ میں امریکی وزیر دفاع لائیڈ آسٹن کے حوالے سے بتایا گیا ہے کہ امریکا نے مشرق وسطیٰ میں کئی نامعلوم مقامات پر نصب پیٹریاٹ اینٹی میزائل ڈیفنس سسٹم اور ٹرمینل ہائی آلٹی ٹیوڈ ایریا ڈیفنس بیٹری (تھاڈ) کو فعال کر دیا ہے ۔

امریکی فوج کی طرف سے یہ دعویٰ بھی کیا گیا ہے کہ ان جنگی جہازوں نے یمن میں حوثی باغیوں کی طرف سے اسرائیل میں اہداف کو نشانہ بنانے کے لئے فائر کئے گئے کم از کم تین میزائلوں اور اسرائیل کی طرف روانہ کئےگئے متعدد ڈرونز کو مار گرایا ہے۔