سوشل میڈیا انفلوئنسرز کو سرکاری خزانے سے ادائیگیوں کے الزام بے بنیاد ہیں، پی ٹی آئی

پی ٹی آئی نے سوشل میڈیا ٹیم کو سرکاری خزانے سے ادائیگی کے الزام کو بے بنیاد قرار دیتے ہوئے کہا کہ سوشل میڈیا ٹیم اور انفلوئنسرز دونوں الگ تھے، پی ٹی آئی سوشل میڈیا ٹیم تحریک انصاف کیلئے نہیں بلکہ حکومت خیبر پختونخوا کیلئے کام کرتے تھے۔

تحریک انصاف کے رہنما بیرسٹر محمد علی سیف نے کہا کہ پی ٹی آئی سوشل میڈیا ٹیم کو سرکاری خزانے سے ادائیگی کا جھوٹا الزام لگایا گیا ،الزامات لگانے والوں نے حقائق جاننے کی کوشش تک نہیں کی۔

بیرسٹر سیف کا کہنا تھا کہ تحریک انصاف اس مسئلے پر ہر قسم کی تحقیقات کیلئے تیار ہے، خیبرپختونخوا میں سوشل میڈیا انفلوئنسرز تحریک انصاف کیلئے نہیں بلکہ حکومت خیبر پختونخوا کیلئے کام کرتے تھے۔

پی ٹی آئی خیبرپختونخوا کے سیکرٹری اطلاعات بیرسٹر ڈاکٹر محمد علی سیف کا سوشل میڈیا انفلونسرز منصوبے پر ردعمل pic.twitter.com/Hd4qoyoXmP

— PTI (@PTIofficial) October 26, 2023

انہوں نے کہا کہ انفلوئنسر سوشل میڈیا پر حکومت خیبرپختونخوا کی اچھی کارکردگی کی تشہیر کرتے تھے، ان سوشل میڈیا انفلوئنسرز کو سرکاری قواعد و ضوابط پورے کرنے اور اشتہار کے بعد بھرتی کیا گیا تھا۔ سوشل میڈیا انفلوئنسر پروفیشنل نوجوان تھے ان کا پی ٹی آئی سے کوئی تعلق نہیں تھا۔ مخالفین اس پر سیاسی بیان بازی کی بجائے ایف آئی اے یا دیگر اداروں سے اس منصوبے کی تحقیقات کروا لیں۔

بیرسٹر سیف نے کہا کہ  پاکستان تحریک انصاف کے سوشل میڈیا ٹیم الگ سے پارٹی کی تشہیر کرتی تھی اس کا کے پی کے حکومت کی سوشل میڈیا ٹیم سے کوئی تعلق نہیں تھا اور پی ٹی آئی کے سوشل میڈیا انفلوئنسر رضاکارانہ طور پر پارٹی کےلئے کام کرتے تھے۔ ابھی تک ایسا کوئی ثبوت نہیں کہ ان انفلوئنسر نے کوئی ریاست مخالف مہم چلائی ہو، پی ٹی آئی پارلیمنٹیرین کے لیڈر محمود خان اس وقت وزیراعلی تھے، سوشل میڈیا انفلوئنسرز پراجیکٹ کا جواب وہ دیں تو بہتر ہو گا۔