ٹرمپ کے بیٹے رواں ہفتے کے دوران مالی فراڈ کے دیوانی مقدمے میں اپنی گواہیاں ریکارڈ کروائیں گے

واشنگٹن ۔1نومبر (اے پی پی):امریکا کے سابق صدر ڈونلڈ ٹرمپ کے بیٹے رواں ہفتے کے دوران عدالت میں مالی فراڈ کے دیوانی مقدمے میں اپنی گواہیاں ریکارڈ کروائیں گے جس سے ان کی کاروباری سلطنت کو شدید دھچکا لگنے کا خطرہ ہے۔

اگر سب کچھ عدالتی شیڈول کے مطابق ہوتا ہے تو ٹرمپ کے بڑے بیٹے، 45 سالہ ڈونلڈ ٹرمپ جونیئر اپنا موقف پیش کریں گے۔ جمعرات کو ان کے چھوٹے بھائی، 39 سالہ ایرک ٹرمپ اپنی گواہی ریکارڈ کروائیں گے۔ دونوں ٹرمپ آرگنائزیشن کے ایگزیکٹو نائب صدور ہیں، جو دنیا بھر میں رہائشی اور دفتری فلک بوس عمارتوں، لگژری ہوٹلوں اور گالف کورسز کا انتظام کرنے والی کمپنیوں کا ایک وسیع نیٹ ورک ہے۔

نیویارک کی ریاست کے اٹارنی جنرل لیٹیا جیمز نے دونوں بھائیوں اور ان کے والد پر الزام لگایا ہے کہ انہوں نے بینک کے قرضوں اور انشورنس کے حصول کے لیے گروپ کے اثاثوں کی مالیت جعلسازی کرتے ہوئے اربوں ڈالر زیادہ بتائی۔ اگر مقدمہ کی سماعت شیڈول کے مطابق آگے بڑھتی ہے تو، 77 سالہ ڈونلڈ ٹرمپ سے آئندہ پیر کو تفتیش کی جائے گی۔ واضح رہے کہ ڈونلڈ ٹرمپ 5 نومبر 2024 کے صدارتی انتخابات کے لیے متوقع امیدوار ہیں ۔