چیئرمین پی ٹی آئی کی بیٹوں سے بات نہ کرانے پر سپرنٹنڈنٹ اڈیالہ جیل کو نوٹس جاری

آفیشل سیکرٹ ایکٹ عدالت نے چیئرمین پی ٹی آئی کی بیٹوں سے بات نہ کرانے پر سپرنٹنڈنٹ اڈیالہ جیل کو نوٹس جاری کر دیا۔

چیئرمین پی ٹی آئی عمران خان نے وکیل شیراز احمد رانجھا کی وساطت سے بیٹوں سے بات نہ کرانے پر سپرنٹنڈنٹ اڈیالہ جیل کیخلاف توہین عدالت کی درخواست دائر کی۔

سابق وزیراعظم کی جانب سے درخواست میں موقف اپنایا گیا کہ حکم  کے باوجود سپرنٹنڈنٹ اڈیالہ جیل نے چیئرمین پی ٹی آئی عمران خان کی بیٹوں سے بات نہ کروا کر عدالتی احکامات پر عمل درآمد نہیں کیا۔

درخواست میں استدعا کی گئی ہے کہ عدالتی احکامات پر عمل نہ کرنے پر سپرنٹنڈنٹ اڈیالہ جیل کے خلاف توہین عدالت کی کارروائی شروع کی جائے، جیل حکام کو چیئرمین پی ٹی آئی عمران خان کی بیٹوں سے بات کرانے کے حکم پر عمل درآمد کا حکم دیا جائے۔

بعدازاں خصوصی عدالت کے جج ابوالحسنات ذوالقرنین نے جیل حکام کو جواب جمع کرانے کیلئے نوٹس جاری کرتے ہوئے سماعت 8 نومبر تک کیلئے ملتوی کردی۔