ڈی آئی خان میں دہشت گردوں کے حملے میں دو پولیس اہلکار شہید

ڈی آئی خان: ضلع درازندہ میں آئل گیس کمپنی کے کیمپ پر دہشت گردوں کے حملے میں ڈیوٹی پر موجود 2 پولیس اہلکار شہید جب کہ 3 زخمی ہوگئے۔

شہید اہلکاروں میں رحمت الٰہی اور محمد عارف شامل ہیں جب کہ زخمی اہلکاروں میں اے ایس آئی عالمشیر، فضل الرحمان اور عطا الرحمان شامل ہیں۔

پولیس کے مطابق حملہ الحاج آئل اینڈ گیس پرائیویٹ ڈرلنگ کمپنی پر کیا گیا۔ زخمیوں کو ڈی ایچ کیو ہسپتال منتقل کر دیا گیا جبکہ ایک اہلکار کی حالت تشویشناک ہے۔

پولیس کا مزید کہنا ہے کہ کمپنی کیمپ پر پولیس کی نفری تعینات تھی جسے نشانہ بنایا گیا، پولیس کی مزید نفری موقع پر پہنچ گئی جب کہ دہشت گردوں کی تلاش جاری ہے۔