بھارت،نئی دہلی میں فضائی آلودگی کا معاملہ سنگین، گاڑیوں کا استعمال محدود کرنے کا فیصلہ

نئی دہلی: بھارت کے دارلحکومت نئی دہلی میں بڑھتی فضائی آلودگی پر قابو پانے کے لیے آئندہ ہفتے سے شہر میں گاڑیوں کا استعمال محدود کرنے کا فیصلہ کیا گیا ہے۔برطانوی خبر رساں ادارے کے مطابق ہر برس موسم سرما کے آغاز میں نئی دہلی دنیا کے آلودہ ترین شہروں کی فہرست میں سب سے اوپر ہوتا ہے۔

آلودگی کی وجہ کم درجہ حرارت کے دوران دھواں چھوڑتی گاڑیاں، فیکٹریاں اور فصلوں کی باقیات کو لگائی جانے والی آگ سے ا ٹھتا دھواں ہے،عوام نے اس صورتحال پر تشویش کا اظہار کیا ہے۔

ریاستی حکومت نے پرائمری سکولوں کی چھٹیاں 10 نومبر تک بڑھانے کا اعلان کیا ہے۔مقامی حکومت کا کہنا ہے کہ وہ آلودگی کی سطح کو کم کرنے کے لیے 13 سے 20 نومبر تک گاڑیوں پر ’آڈ ایون‘ کا اصول نافذ کرے گی جس کے تحت طاق نمبر پلیٹ والی گاڑیوں کو طاق تاریخوں پر سڑکوں پر آنے اور جفت نمبر پلیٹس والی گاڑیوں کو جفت تاریخوں پر چلنے کی اجازت ہوگی۔

ماحولیاتی ماہرین نے کہا ہے کہ یہ اصول 2016 سے اب تک کئی مرتبہ لاگو کیا جا چکا ہے لیکن یہ فضائی آلودگی کو کم کرنے میں اتنا مؤثر ثابت نہیں ہوا ۔