غزہ کی پٹی کے ہسپتالوں کو تحفظ فراہم کیا جانا چاہیے، امریکی صدر

امریکی صدر جو بائیڈن نے کہا کہ غزہ کی پٹی کے ہسپتالوں کو تحفظ فراہم کیا جانا چاہیے۔

بائیڈن نے اوول آفس میں صحافیوں کو بتایا کہ امید اور توقع یہ ہے کہ ہسپتالوں کے حوالے سے کم دخل اندازی ہوگی اور ہم اسرائیلیوں کے ساتھ اس حوالے سے رابطے میں رہیں گے۔

امریکی صدر نے مزید کہا کہ اس کے علاوہ قیدیوں کی رہائی کے مسٔلے سے نمٹنے کے لیے جنگ میں وقفے کی کوشش کی جا رہی ہے اور اس کے ساتھ ساتھ قطری حکام کے ساتھ بھی بات چیت کی جا رہی ہے۔ لہذا میں کسی حد تک پر امید ہوں لیکن ہسپتالوں کی حفاظت بہرحال ہونی چاہیے۔

صدر بائیڈن کا یہ بیان اس وقت سامنے آیا ہے جب طبی ماہرین نے ہسپتال میں نوزائیدہ بچوں سمیت مریضوں کی بڑھتی ہوئی اموات کے بارے میں خبردار کیا ہے۔

برطانوی خبر رساں ادارے رائیٹرز کے مطابق اسرائیلی ٹینکوں نے غزہ شہر کے مرکزی الشفا ہسپتال کے باہر پوزیشنیں سنبھال رکھی ہیں جس کے بارے میں اسرائیل کا دعویٰ ہے کہ ہسپتال کے نیچے سرنگوں میں حماس کے جنگجوؤں کا ہیڈکوارٹر ہے جو مریضوں کو ڈھال کے طور پر استعمال کر رہے ہیں۔ حماس اس اسرائیلی دعوے کی تردید کرتی ہے۔

فلسطینی طبی حکام کا کہنا ہے کہ اسرائیلی جارحیت میں 11 ہزار سے زائد افراد کی اموات کی تصدیق ہوئی ہے جن میں سے تقریباً 40 فیصد بچے ہیں۔

گنجان آباد بحیرہ روم کے ساحل پر واقع اس پٹی کا تقریباً دو تہائی حصہ اسرائیل کی فوجی مہم سے بے گھر ہو گیا ہے جس میں اس نے غزہ کے شمالی نصف حصے کو خالی کرنے کا حکم دیا ہے