بھارت میں مسلمانوں سمیت اقلیتوں کے خلاف عدم برداشت میں خطر ناک حد تک اضافہ ہو ا ہے، رپورٹ

اسلام آباد: نریندر مودی کے بھارت اور بھارت کے غیر قانونی زیر تسلط جموں و کشمیر میں مسلمانوں اور دیگر اقلیتوں کے خلاف عدم برداشت میں خطر ناک حد تک اضافہ ہو ا ہے۔کے ایم ایس کی طرف سے جمعرات ”روا داری “ کے عالمی دن پر جاری کی گئی ایک رپورٹ میں کہا گیا ہے کہ بھارت میں ہندوتوا تنظیموں نے بی جے پی حکومت کی سرپرستی سے مسلمانوں اور دیگر اقلیتوں کا جینا حرام کر رکھا ہے۔ بھارتی فورسز نے مقبوضہ علاقے میں بے گناہ شہری آبادی کے خلاف جنگ شروع کر رکھی ہے۔

رپورٹ میں کہا گیا ہے کہ مودی کا بھارت مذہبی اقلیتوں کے خلاف بڑے پیمانے پر پرتشدد عدم برداشت کا شکار ہے۔ کشمیریوں کو اپنے ناقابل تنسیخ حق ،حق خودارادیت کا مطالبہ کرنے پر بدترین ریاستی دہشت گردی کا نشانہ بنایا جا رہا ہے، 2014 میں مودی کے وزیر اعظم بننے کے بعد سے مسلمانوں اور دیگر اقلیتوں کے خلاف نفرت انگیز جرائم میں خطرناک حد تک اضافہ ہوا ہے۔ ’’روا داری“ کا عالمی دن منانے کا مقصد پرامن بقائے باہمی اور مختلف مذہبی عقائد، اقدار اور ثقافتوں کے احترام کی اہمیت کو اجاگر کرنا ہے لیکن ہندو دہشت گرد مودی حکومت کی سرپرستی میں مسلمانوں اور دیگر اقلیتوں کو دھمکیاں دیتے ہیں۔

انہیں قتل کرتے ہیں اور ان کی عبادت گاہوں میں توڑ پھوڑ کرتے ہیں ، انہیں جسمانی، نفسیاتی اور معاشی طور پر نشانہ بناتے ہیں۔رپورٹ میں کہا گیا ہے کہ مودی حکومت راشٹریہ سویم سیوک سنگھ (آر ایس ایس)، بھارتیہ جنتا پارٹی (بی جے پی)، وشو ہندو پریشد (وی ایچ پی)، بجرنگ دل وغیرہ سے وابستہ انتہا پسند ووں کی حوصلہ افزائی کر رہی ہے۔ دنیاکے سب سے بڑے نام نہاد جمہوری ملک بھارت میں مسلمانوں، عیسائیوں اور نچلی ذات کے ہندوئوں کودوسرے درجے کا شہری سمجھا جاتا ہے ،مسلمان اور دیگر اقلیتیں خوف ودہشت کی حالت میں زندگی گزار رہی ہیں۔