اسرائیل کا غزہ کے انڈونیشی ہسپتال پر بمباری، 12 فلسطینی شہید

7 اکتوبر کو غزہ کی پٹی پر جنگ شروع ہونے کے بعد سے اسرائیل نے حماس کے مراکز اور ان کے نیچے سرنگوں کی موجودگی کے بہانے خاص طور پر شمال میں پٹی کے بہت سے ہسپتالوں کو نشانہ بنایا ہے۔ تاہم حماس نے بار بار اور واضح طور پر ہسپتالوں کو فوجی مقاصد کے لیے استعمال کرنے کی تردید کی ہے۔

غیر ملکی خبر رساں ایجنسی کے مطابق پیر کے روز شمالی غزہ میں انڈونیشیا کے ہسپتال کے آس پاس کے علاقے پر شیلنگ اور فضائی بمباری کی گئی ،دریں اثنا فلسطینی وزارت صحت نے اعلان کیا کہ انڈونیشیا کے ہسپتال پر اسرائیلی حملے کے نتیجے میں 12 شہید اور متعدد زخمی ہوئے ہیں۔

بمباری کے نتیجے میں بے گھر افراد، مریض اور ڈاکٹر زخمی ہوئے۔ انہوں نے وضاحت کی کہ ایک گولہ ہسپتال کے صحن کے اندر گرا، جبکہ قریبی عمارتوں میں سے ایک میں آگ بھڑک اٹھی۔

انہوں نے مزید کہا کہ بمباری کی کارروائیوں کی وجہ سے جنریٹر بند ہونے کے بعد ہسپتال سے بجلی منقطع کر دی گئی۔ نیز غزہ کے صحت کے ڈائریکٹر جنرل ڈاکٹر منیر البرش نے بتایا کہ بمباری میں انڈونیشیا کے ہسپتال کے آپریشنز کے شعبے کے ساتھ ساتھ ہسپتال کے اطراف کو بھی نشانہ بنایا گیا۔

اس کے علاوہ اسرائیلی بمباری میں غزہ کی پٹی کے شمال میں جبالیہ میں العودہ ہسپتال کے آس پاس کے علاقے اور رفح کے مشرق میں النجار ہسپتال کے قریب دو مکانات کو بھی نشانہ بنایا گیا۔