غزہ میں جنگ بندی کےلئے بین الاقوامی برادری اپنی کوششیں تیز کرے، چین

اقوام متحدہ میں چین کے مستقل مندوب جانگ جون نے کہا ہے کہ ان کا ملک غزہ میں امن بحالی کے لیے کوششیں کر رہا ہے۔

چینی خبررساں ادارے کے مطا بق متحدہ عرب امارات اور مالٹا کی درخواست پر اقوام متحدہ کی سلامتی کونسل کے چین کی سربراہی میں غزہ کی پٹی کی صورتحال بارے ایک اجلاس میں مندوب جانگ جون نے کہا کہ ان کا ملک امن کی بحالی کے لیے انتھک کوششیں کر رہا ہے،بین الاقوامی برادری کو جنگ بندی کے فروغ کے لئے فوری طور پراپنی کوششوں کو تیز کرنا چا ہیے۔

انہوں نے کہا کہ چین عام شہریوں کے مکمل تحفظ کا مطالبہ ،غزہ کی پٹی میں بین الاقوامی انسانی قوانین کی واضح خلاف ورزیوں کی شدید مذمت اور دو ریاستی حل کے سیاسی امکانات کو بحال کرنے کی کوششوں کا حامی ہے۔موجودہ صورتحال کا کوئی بھی حل دو ریاستی حل سے منحرف نہ ہو اور یہ علاقائی امن و استحکام کے لئے سازگار ہونا چاہیے۔

انہوں نے کہا کہ فلسطین کے مستقبل اور تقدیر کے بارے میں کوئی بھی انتظام فلسطینی عوام کی رضامندی اور خطے کے ممالک کے جائز خدشات کو مدنظر رکھتے ہوئے کیا جانا چاہئے۔ اقوام متحدہ کو بین الاقوامی اتفاق رائے پیدا کرنے اور امن عمل کو آگے بڑھانے میں فعال کردار ادا کرنا چاہئے۔ سلامتی کونسل کو فلسطین اسرائیل صورتحال پر ذمہ دارانہ اور بامعنی کارروائی کرنے کے لئے تیار رہنا چاہئے جو تاریخ اور ضمیر کے امتحان پر پورا اتر سکتی ہیں