انوارلحق کا کڑ کی امام کعبہ سے ملاقات ،نواجوانوں کو اسلامی تاریخ کی آگاہی دینے پر تبادلہ خیال

نگران وزیراعظم انوار الحق کاکڑ نے اسلام کے خلاف پراپیگنڈے کی روک تھام کیلئے نوجوانوں کو دستاویزی فلموں کے ذریعے عظیم اسلامی تاریخ کے بارے میں آگاہی دینے پر زور دیا ہے۔

آج اسلام آباد میں امامِ کعبہ پروفیسر ڈاکٹر شیخ صالح بن عبداللہ بن حمید سے گفتگو کرتے ہوئے انہوں نے اسلام کے اصل پیغام کو پھیلانے کیلئے ان دستاویزی فلموں کو مختلف زبانوں میں نشر کرنے پر زور دیا۔

وزیراعظم نے غزہ میں فلسطینیوں پر مظالم اور بچوں کے قتل عام کی بھی شدید مذمت کی۔

غزہ میں فوری جنگ بندی پر زور دیتے ہوئے انہوں نے غزہ کو امداد کی فراہمی کیلئے امدادی رستوں کے قیام کا مطالبہ کیا۔انوار الحق کاکڑ نے فلسطینیوں کی غیر مشروط مدد کا واضح پیغام دینے پر خادم حرمین شریفین اور سعودی عرب کے ولی عہد کی تعریف کی۔پاکستان اور سعودی عرب کے تعلقات سے متعلق گفتگو کرتے ہوئے وزیراعظم نے کہا کہ دونوں ملکوں کے مشترکہ عقیدے، مقاصد اور مضبوط ثقافتی بنیادوں کے حوالے سے تاریخی اور دیرینہ دوستانہ تعلقات ہیں۔وزیراعظم نے پاکستان میں تعلیم اور صحت کے شعبوں کی ترقی کیلئے سعودی تعاون کا شکریہ ادا کیا۔اس موقع پر اظہار خیال کرتے ہوئے امام کعبہ نے سعودی عرب کی ترقی و خوشحالی میں پاکستانی افرادی قوت کے اہم کردار کی تعریف کی انہوں نے پاکستان اور سعودی عرب کے درمیان دیرینہ دوستانہ تعلقات کو اجاگر کیا۔