سعودی پبلک انویسٹمنٹ فنڈ کا ہیتھرو ایئرپورٹ کے دس فیصد شیئرز خریدنے کا معاہدہ

ریاض: سعودی عرب کے پبلک انویسٹمنٹ فنڈ (پی آئی ایف)نے ہسپانوی انفراسٹرکچر کمپنی فیروویل سے لندن کے ہیتھرو ایئرپورٹ کے دس فیصد شیئرز کی خریداری کا معاہدہ کیا ہے۔

عرب نیوز کے مطابق پی آئی ایف نے ہیتھرو ایئرپورٹ کے شیئرز کی خریداری کا فیصلہ اس وقت کیا جب ایئرپورٹ کے 25 فیصد شیئرز کی مالک ہسپانوی کمپنی نے اپنے شیئرز فروخت کرنے کی منظوری دی، فیروویل کا کہنا ہے کہ یہ معاہدہ تین ارب ڈالرکا ہے جبکہ پی آئی ایف نے بتایا کہ یہ خریداری اب بھی ریگولیٹری منظوری سے مشروط ہے۔

اس معاہدے کی منظوری سے برطانوی ایئرپورٹس کے آپریٹر زمیں ہسپانوی کمپنی کی سرمایہ کاری ختم ہوجائے گی جس کا آغاز 56 فیصد سے ہوا لیکن 2013 میں اسے کم کرکے 25 فیصد کردیا گیا۔

معاہدے کے تحت سعودی پبلک انویسمنٹ فنڈ ہسپانوی کمپنی فیرووئل کے دس فیصد جبکہ فرانس میں قائم پرائیویٹ ایکویٹی فنڈ اس کے پندرہ فیصد شیئرز حاصل کرے گا۔ واضح رہے کہ ہیتھرو ایئرپورٹ کو بین الاقوامی سٹریٹجک حیثیت حاصل ہے، یہ دنیا کے مصروف ترین ایئرپورٹس میں سے ایک ہے، برطانیہ اس کے ذریعے دنیا بھر میں اپنے کاروباری پارٹنرز کے ساتھ منسلک ہے۔