مرتضیٰ سولنگی کی سندھ کے وزیر اطلاعات محمد احمد شاہ سے ملاقات ،بر وقت انتخابات کی یقین دہانی

اطلاعات و نشریات کے نگران وزیر مرتضیٰ سولنگی نے عام انتخابات کے بارے میں ہرقسم کے تحفظات کو رد کرتے ہوئے کہا  ہے کہ عام انتخابات آئندہ سال آٹھ فروری کو ہی ہونگے۔

انہوں نے سندھ کے وزیر اطلاعات محمد احمد شاہ کے ہمراہ آج کراچی میں ذرائع ابلاغ کے نمائندوں سے گفتگو کرتے ہوئے آزادانہ، منصفانہ اور شفاف انتخابات کے انعقاد کیلئے الیکشن کمیشن کی ہر مالی، انتظامی اور سکیورٹی کی ضرورت پوری کرنے کے حکومت کے عزم کا اظہار کیا۔

مرتضیٰ سولنگی نے کہا کہ انتخابات کے انعقاد کا ذمہ دار کوئی اور ادارہ نہیں بلکہ صرف الیکشن کمیشن ہے اور حکومت اس سلسلے میں معاونت کرے گی۔ انہوں نے کہا کہ انتخابات کے ذریعے وفاق اور صوبائی سطح پر اپنی مرضی کی حکومتیں لانا لوگوں کا حق ہے۔

وفاقی وزیر نے کہا کہ نگران حکومت تمام شعبوں میں بہتری لانے کیلئے اقدامات کر رہی ہے تاکہ ملک بہتر حالت میں منتخب حکومت کے حوالے کیا جا سکے۔انہوں نے کہا کہ وفاقی اور صوبائی حکومتوں کے درمیان رابطہ اور تعاون مضبوط کیا جائے گا اور عام انتخابات کے دوران مشترکہ حکمت عملی وضع کرنے کیلئے تمام صوبائی وزرائے اطلاعات کا ایک اجلاس جلد بلایا جائے گا۔