انوارلحق کاکڑ کی کشمیر کے نگران وزیر اعظم سے ملاقات ،بھارتی سپریم کورٹ کے فیصلےپر تبادلہ خیا ل

نگران وزیراعظم انوار الحق کاکڑ نے کہا ہے کہ پاکستان کشمیری عوام کے ناقابل تنسیخ حقوق اور حق خودارادیت کیلئے اپنی سیاسی، سفارتی اور اخلاقی حمایت جاری رکھے گا۔

 انہوں نے آزاد کشمیر کے نگران وزیراعظم چوہدری انوار الحق سے آج (منگل) کواسلام آباد میں ملاقات بھی کی ہے ۔

انوار الحق کاکڑ نے کہا کہ جموں وکشمیر کے مستقبل کے حوالے سے حتمی فیصلہ اقوام متحدہ، سیکورٹی کونسل سے ملحقہ قراردادوں اور کشمیریوں کی خواہشات کے مطابق ہونا چاہیے۔

انوار الحق کاکڑ نے کہا پاکستان بھارت کے غیرقانونی مقبوضہ جموں وکشمیر کی حیثیت کے بارے میں بھارتی سپریم کورٹ کے فیصلے کو یکسرمسترد کرتے  ہیں ۔

انہوں نے کہا کہ کشمیری عوام کی مرضی اور عالمی قانون و انصاف کی ضروریات کے خلاف متنازعہ علاقے کی حیثیت کو تبدیل کرنے کے فیصلے کرنے کا بھارت کو کوئی حق نہیں پہنچتا۔

انہوں نے کہا کہ بھارت اپنی نام نہاد قانون سازی اور عدالتی فیصلوں کی آڑ میں اپنی بین الاقوامی ذمہ داریوں سے بچ نہیں سکتا۔

انوارالحق کاکڑ نے کہا کہ بھارت کی پانچ اگست دوہزار انیس کی یکطرفہ اور غیرقانونی کارروائی کا مقصد بھارت کے غیرقانونی زیرقبضہ جموں وکشمیر کی جغرافیائی ڈھانچے اور سیاسی منظرنامہ کو تبدیل کرنا ہے جو کہ بین الاقوامی قانون اور اقوام متحدہ کے سلامتی کونسل کی قراردادوں کی کھلم کھلا خلاف ورزی ہے اور اس کی کوئی جواز نہیں ہے۔

ملاقات میں جموں وکشمیر کے متعلق بھارتی سپریم کورٹ کے فیصلے کے بعد کی صورتحال پر بات چیت کی گئی۔