جیکلین فرنانڈیز اور ان کے مبینہ بوائے فرینڈ سکیش چندر شیکھر کے ایک دوسرے پر الزامات

بالی وڈ ہنگامہ کی رپورٹ کے مطابق جیکلین فرنانڈیز اور ان کے مبینہ بوائے فرینڈ سکیش چندر شیکھر ایک دوسرے پر الزامات لگانے کی وجہ سے آج کل خبروں میں ہیں۔ جیل سے محبت بھرے خطوط لکھنے والا ملزم اب بالی وڈ اداکارہ کے خلاف میدان میں آگیا ہے۔

یہ سب اُس وقت شروع ہوا جب جیکلین فرنانڈیز نے مبینہ بوائے فرینڈ کے خطوط سے تنگ آکر دہلی ہائی کورٹ سے رجوع کیا اور استدعا کی کہ ملزم کو پیغامات بھیجنے سے روکنے کیلیے پولیس کو احکامات جاری کیے جائیں۔

اب انکشاف ہوا ہے کہ سکیش چندر شیکھر نے جیل میں قید ہونے کے باوجود خفیہ نمبر سے جیکلین فرنانڈیز کو واٹس ایپ کے ذریعے پیغامات ارسال کیے۔

ملزم کی جانب سے ایک پیغام 30 جون 2023 کو بھیجا گیا جس میں اس نے فرمائش کی تھی کہ ’اس ماہ کی 6 تاریخ کو عدالت میں پیشی کے دوران آپ سیاہ کُرتہ یا اسی رنگ کی کوئی اور چیز پہن کر آئیں تاکہ میں تصدیق کر سکوں کہ آپ کو میرا واٹس ایپ پر بھیجا گیا پیغام موصول ہوگیا ہے۔‘

ایک اور میسج میں سکیش چندر شیکھر نے لکھا تھا کہ ’مجھے یہ دیکھ کر بہت افسوس ہوا کہ آپ نے عدالت میں پیشی کے دوران سیاہ رنگ کی کوئی چیز نہیں پہنی تھی۔ مجھے سمجھ نہیں آ رہی کہ آپ کیا سوچ رہی ہیں، مجھ سے دور بھاگ رہی ہیں یا مجھ سے جان چھڑانا چاہتی ہیں۔‘

ملزم نے پیغام میں لکھا تھا کہ مجھ سے دور ہونا آپ کے فائدے میں نہیں ہوگا، ایک میں ہی ہوں جو آپ کے ساتھ کھڑا ہوں، میں آپ کیلیے کچھ بھی کر سکتا ہوں مجھے کوئی مسئلہ نہیں۔