غزہ کی کشیدہ صورتحال پر غور کیلئے اقوام متحدہ کی جنرل اسمبلی کا اجلاس آج ہو گا

تفصیلات کے مطابق اسلامی تعاون تنظیم کی درخواست پرغزہ کی کشیدہ صورتحال پر غورکے لئے اقوام متحدہ کی جنرل اسمبلی کا ہنگامی اجلاس  آج  ہوگا،  مظلوم فلسطینیوں کے لیے اقوام متحدہ میں آواز بلند کرنے وزیر خارجہ شاہ محمود قریشی نیو یارک پہنچ گئے، پاکستان، ترکی، سوڈان اور فلسطین کے وزرائے خارجہ ایک ساتھ گئے ہیں۔ تیونس کے وزیر خارجہ بھی قافلے میں شامل ہیں۔وزیر خارجہ شاہ محمود  وزیراعظم عمران خان کی خصوصی ہدایت پر فلسطینیوں کی حمایت کیلئے سفارتی مشن پر ہیں۔

اس سے قبل  صدرجنرل اسمبلی والکربوزکراوراوآئی سی ممالک کے اقوام متحدہ میں مستقل مندوبین ‏نے بھی عشائیہ میں شرکت کی‎ ‎، پاکستان کے اقوامِ متحدہ میں مندوب منیر اکرم اور امریکا میں سفیر اسد مجید خان بھی عشائیے میں موجود تھے۔وزیرِ خارجہ شاہ محمود قریشی نے استقبالیہ خطاب میں نہتے فلسطینیوں پر ڈھائی جانےوالی بربریت کا ذکر کیا، انہوں نے انسانی حقوق کی خلاف ورزیوں اور امن و امان کو درپیش خطرات کا حوالہ بھی دیا۔ وزیرخارجہ نے اس نئے انسانی المیے کے تدارک کیلئے مشترکہ کاوشیں بروئے کار ‏لانے کی ضرورت پر زور دیا‎ ‎۔وزیرخارجہ نے معززمہمانوں کو فلسطین میں قیام امن کے حوالے سے پاکستان کی ‏سفارتی کاوشوں سے آگاہ کیا‎ ‎۔

واضح رہے کہ مغربی کنارے اور غزہ کی پٹی میں اسرائیل کی جارحیت  گیارہویں  روز بھی جاری  ہے ۔ عرب میڈیا کے مطابق اب تک  اسرائیلی جارحیت کے باعث 64 بچوں سمیت 227 فلسطینی شہید ہوچکے ہیں۔