وزیراعلیٰ خیبرپختونخوا نے اسلام آباد میں صوبے کے شہریوں کی گرفتاریوں کے معاملے پر پر تشویش کا اظہار کرتے ہوئے معاملے سے متعلق وزیراعظم شہبازشریف کوخط لکھ دیا۔

خط میں وزیر اعلیٰ نے بے بنیاد انسداد دہشت گردی ایکٹ (ATA) کے مقدمات اور پختون مزدوروں کی گرفتاری پر اپنے تحفظات کا بھی اظہار کیا۔

اپنے خط میں وزیراعلیٰ خیبرپختونخوا علی امین گنڈا پور نے کہا کہ یہ افراد، جو عموماً کم اجرت والے کاموں میں مصروف ہیں، حالیہ پرامن سیاسی احتجاج کے بعد غیر منصفانہ طور پر نشانہ بنے ہیں، خیبرپختونخوا کے گرفتار شہریوں کو رہا کیا جائے۔

خط میں علی امین گنڈاپور نے مزید کہا کہ پاکستان جیسے وفاق میں اکثریتی طاقت کے بجائے ضروری ہے کہ سیاسی معاملات کو پرامن اور تعمیری مکالمے کے ذریعے حل کیا جائے۔

گنڈاپور نے وزیر اعظم سے اپیل کی کہ وہ ان "جعلی ایف آئی آرز" کو ختم کریں اور غیر منصفانہ طور پر گرفتار کیے گئے افراد کو فوری رہا کریں۔

چیئرمین پاکستان کرکٹ بورڈ محسن نقوی نے ٹی ٹوئنٹی ورلڈ کپ جیتنے پر بلائنڈ کرکٹ ٹیم کے کھلاڑیوں کو اپنا مہمان بنایا اور حوصلہ افزائی کرتے ہوئے ایک کروڑ روپے کا چیک بھی دیا ۔

تفصیلات کے مطابق چیئرمین پاکستان کرکٹ بورڈ محسن نقوی نے ٹی ٹوئنٹی ورلڈ کپ جیتنے والی بلائنڈ کرکٹ ٹیم کے کھلاڑیوں کی بھرپور حوصلہ افزائی کی، تمام کھلاڑیوں کو نیشنل کرکٹ اکیڈمی میں اپنا مہمان بنایا اور اس موقع پر  ورلڈ کپ جیتنے پر کھلاڑیوں کو ایک کروڑ روپے کا چیک بھی دیا ۔

محسن نقوی نے کھلاڑیوں کی کارکردگی کو سراہتے ہوئے کہا کہ  آپ کی جیت پاکستان کی جیت ہے ، آپ نے  ٹی ٹوئنٹی ورلڈ کپ جیت کر پاکستان کا نام روشن کیا ہے، بلائنڈ کرکٹ ورلڈ کپ جیتنے سے قوم کو خوشیاں ملی ہیں ، بلائنڈ کرکٹ ٹیم  کے کھلاڑی ہمارے لئے بہت اہمیت رکھتے ہیں۔

اس کے علاوہ چیئرمین پی سی بی محسن نقوی نے بلائنڈ کرکٹ ایسوسی ایشن کو 2 کروڑ روپے کی گرانٹ کا  چیک  بھی دیا ،چیئرمین   پی سی بی محسن نقوی نے بلائنڈ کرکٹ ٹیم کے کھلاڑیوں کی شاندار کارکردگی کو سراہتے ہوئے ورلڈ کپ جیتنے پر مبارک باد دی ۔

چیئرمین پی سی بی کا کہناتھا کہ بلائنڈ کرکٹ ٹیم کے کھلاڑیوں کو پورا سپورٹ کریں گے،بلائنڈ کرکٹ ٹیم کی ضروریات کو پورا کیا جائے گا، امید ہے کہ آپ فتوحات کا سلسلہ برقرار رکھیں گے۔

واضح رہے کہ چیئرمین بلائنڈ کرکٹ ایسوسی ایشن سلطان شاہ کا کہناتھا کہ  بلائنڈ کرکٹ ٹیم  کی بھرپور سپورٹ پر  چیئرمین  پی سی بی محسن نقوی کا شکریہ ادا کرتے ہیں۔

جوائنٹ چیفس آف اسٹاف کمیٹی کے چیئرمین جنرل ساحر شمشاد مرزا نے عراق کا دورہ کیا اور اس دوران انہوں نے عراق کے وزیراعظم، وزیر دفاع، وزیر داخلہ اور چیف آف ڈیفنس فورسز سے ملاقاتیں کیں۔

پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران جنرل ساحر شمشاد مرزا اور عراقی قیادت نے باہمی دلچسپی کے امور بشمول سلامتی دفاعی تعاون اور علاقائی صورتحال پر تبادلہ خیال کیا۔

اس کے علاوہ پاکستانی اور عراقی حکام نے عسکری تعلقات کو فروغ دینے سے متعلق بھی تبادلہ خیال کیا۔

ترجمان پاک فوج کے مطابق عراق کی سول و ملٹری قیادت نے پاکستانی مسلح افواج کی پیشاورانہ مہارت اور دہشت گردی کے خلاف جنگ میں قربانیوں کا اعتراف کیا۔

آئی ایس پی آر نے بتایا کہ عراقی مسلح افواج کے ہیڈ کوارٹرز آمد پر چیئرمین جوائنٹ چیفس آف اسٹاف کمیٹی کو گارڈ آف آنر پیش کیا گیا۔

دوران ملاقات چیئرمین جنرل ساحر شمشاد مرزا اور عراقی  قیادت نے دفاع تعلقات کو مزید مضبوط بنانے کے عزم کا اعادہ بھی کیا۔