شیخوپورہ میں ضمنی انتخاب، پولنگ کا عمل جاری

پنجاب اسمبلی کے حلقہ پی پی 139 شیخوپورہ میں ضمنی انتخاب کے لیے پولنگ کا عمل جاری ہے۔

الیکشن کمیشن کے مطابق پنجاب اسمبلی کے حلقہ پی پی 139 شیخوپورہ میں پولنگ کا عمل صبح 8 بجے سے شام 5 بجے تک بغیر کی وقفے کے جاری رہے گا۔ حلقے میں تحریک انصاف کے حمایت یافتہ آزاد امیدوار چوہدری اعجاز حسین بھٹی اور مسلم لیگ ن کے رانا طاہر اقبال کے درمیان کانٹے کا مقابلہ ہے۔ تحریک لبیک پاکستان کے فاروق الحسن سمیت حلقے میں مزید 7 آزاد امیدوار بھی میدان میں موجود ہیں۔

پولنگ کے موقع پر سکیورٹی کے انتہائی سخت حفاظتی انتظامات کیے گئے ہیں۔ جبکہ حلقے میں عام تعطیل کا بھی اعلان کیا گیا ہے۔

الیکشن کمیشن کے مطابق حلقے میں کل 359 پولنگ اسٹیشنز قائم کیے گئے ہیں۔ ایک لاکھ 86 ہزار 247 ووٹرز اپنا حق رائے دہی استعمال کریں گے۔ ضمنی انتخاب کے لیے 124 پریذائیڈنگ افسران 359اسسٹنٹ پریزائیڈنگ افسران ڈیوٹی سر انجام دے رہے ہیں۔ ڈی پی او بلال شیخ نے حلقے کے مختلف پولنگ اسٹیشنز کا دورہ کیا۔ اور سیکیورٹی کے انتظامات کا جائزہ لیا۔

واضح رہے کہ مذکورہ نشست مسلم لیگ ن کے رانا افضال حسین کے انتقال کے باعث خالی ہوئی تھی۔