پی ٹی آئی کے ووٹرز اپنے امیدواروں کی پہچان کریں، چیئرمین پی ٹی آئی

پاکستان تحریک انصاف کے رہنما بیرسٹرگوہر نے کہا ہے کہ پی ٹی آئی کے ووٹر اپنے امیدواروں کی پہچان کریں ،جس مقصد کیلئے سابق چیئرمین پی ٹی آئی جیل میں ہیں اس کو پورا کریں گے۔

راولپنڈی اڈیالہ جیل کے باہر میڈیا سے گفتگو کرتے ہوئے رہنما تحریک انصاف بیرسٹر گوہر نے کہا کہ سپریم کورٹ کے فیصلے پر نظرثانی اپیل دائر کریں گے، سپریم کورٹ کے بلے کے فیصلے سے 25 کروڑ عوام کے بنیادی حقوق متاثر ہوئے ہیں ، یہ جمہوریت کے خلاف ایک سازش کامیاب ہوئی ہے۔

چیئرمین پی ٹی آئی کا کہنا تھا کہ جمہوریت کا ایک بڑا نقصان ہوا ہے اس سے کرپشن کی ایک ابتدا ہوگی۔ آئین کے تحت کیا کسی پارٹی سے نشان واپس لیا جا سکتا ہے یا نہیں، قانون کے تحت اس کیس کو سپریم کورٹ کے 3 رکنی بینچ نے نہیں 5 رکنی بینچ کو سننا چاہیئے تھا۔

انہوں نے مزید کہا کہ پی ٹی آئی 3 دنوں کے اندر اپنے امیدوار کی انتخابی نشانات کے ساتھ لسٹ جاری کرے گی، عوام سے اپیل ہے پی ٹی آئی کے منتخب کردہ نمائندوں کو ووٹ دیگر کامیاب بنائیں، جو سیٹیں پینڈنگ میں رکھی تھی وہ جلدی فائنل ہو جائیں گی۔ ہم کسی صورت الیکشن سے بائیکاٹ نہیں کریں گے۔پی ٹی آئی کے امیدواروں کی لسٹیں ویب سائٹ پر اپلوڈ کریں گے ،پی ٹی آئی کے ووٹر اپنے امیدواروں کی پہچان کریں ،جس مقصد کیلئے سابق چیئرمین پی ٹی آئی جیل میں ہیں اس کو پورا کریں گے۔

پی ٹی آئی رہنما کا کہنا تھا کہ بانی پی ٹی آئی عمران خان کا ووٹرز کو یہ مسیج ہے کہ گھبرانا نہیں ہے اپنے ووٹ کی حفاظت کرنی ہے، آپ اپنے ووٹرز اور امیدوار کی پہچان کریں، آج کسی بھی وقت مشاورت مکمل ہوجائے گی، 8 فروری کو فتح آپ کی ہوگی آپ متحد رہیں۔

بیرسٹر گوہر نے یہ بھی کہا کہ کل رات 9 بجے تک تمام لسٹیں فائنل کرلیں گے، سنی اتحاد کونسل سے ہمارا کبھی اتحاد نہیں ہوا، پاکستان کو جمہوری ملک بنانا چاہتے ہیں، شیخ رشید سے ہمارا اتحاد پہلے تھا، پی ٹی آئی کے ووٹرز اور عہدیدار اختلافات میں نہ پڑیں۔