اسرائیل اور حماس کے درمیان ایک نئے معاہدے پر باضابطہ اتفاق

اسرائیل اور حماس کے درمیان قطر کی مدد سے ایک نئے معاہدے پر باضابطہ اتفاق ہو گیا ہے۔ اس معاہدے کے لیے دوحہ اور پیرس کی طرف سے مذاکرات میں سہولت کاری کی گئی۔

غیر ملکی خبر رساں اجنسی کے مطابق قطری وزارت خارجہ کے بیان میں کہا گیا ہے کہ معاہدے کے تحت ادویات اور انسانی بنیادوں پر دوسری اشیاء کا غزہ میں شہریوں تک پہنچنا ممکن ہو سکے گا نیز غزہ میں ادویات کی ترسیل کی راہ میں اسرائیلی رکاوٹوں کے ہٹائے جانے کے بدلے میں اسرائیلی یرغمالیوں کو بھی ادویات کی فراہمی ممکن بنائی جائے گی۔

اسرائیلی وزیر اعظم نیتن یاہو کے دفتر کی طرف سے ابھی اس معاہدے کی تصدیق کر دی گئی ہے۔ ترجمان کے مطابق یرغمالیوں کے لیے یہ ادویات قطر کے نمائندوں کے زریعے بھجوائی جائیں گی جو بعد ازاں اسرائیلی یرغمالیوں کو فراہم ہو سکیں گی۔

واضح رہے تقریباً ڈیڑھ ماہ کے بعد اسرائیل اور حماس کے درمیان یہ بالواسطہ پیش رفت سامنے آئی ہے۔ اس سے پہلے ماہ نومبر کے آخر میں غزہ جنگی وقفوں پر اتفاق کے بدولت 140 کے قریب اسرائیلی یرغمالیوں کو رہائی مل گئی تھی۔

مگر یکم دسمبر سے اسرائیل نے جنگ بندی ختم ہوتے ہی خوفناک بمباریاں شروع کر دیں۔ ابھی بھی تقریبا 132 کے قریب اسرائیلی یرغمالی حماس کی قید میں ہیں، تاہم ان میں سے 25 یا 27 کے بارے میں کہا جارہا ہے کہ وہ شاید اب زندہ نہیں رہے ہیں۔

غزہ میں اسرائیلی بمابری کے نتیجے میں اب تک 24 ہزار 285  فلسطینی ہلاک ہو چکے ہیں۔ جبکہ زخمیوں کی تعداد 62 ہزار کے قریب ہے ۔ اسرائیلی فوج نے ایک جانب غزہ کے تقریباً تمام ہسپتالوں کو تباہ کر دیا ہے یا ناکارہ بنا دیا ہے۔ مزید یہ کہ غزہ کے بچے کھچے ہسپتالوں تک ادویات کی ترسیل تو درکنار پانی اور بجلی کی فراہمی بھی روک رکھی ہے۔