مسلم لیگ (ن) نے شرح نمو کے حکومتی دعوے کو فراڈ ‏قرار دے دیا

تفصیلات کے مطابق مسلم لیگ ن کی ترجمان مریم اورنگزیب کا کہنا ہے کہ محکمہ شماریات کے چیف سٹیسٹیشن کا عہدہ خالی رکھ کر اعدادوشمار کے ساتھ ہیرا ‏پھیری قوم اور ملک کے ساتھ سنگین دھوکہ اور فراڈ ہے،جن اعدادوشمارکوسٹیٹ بینک اورمحکمہ خزانہ قبول نہ کرے، ان کی کوئی حیثیت نہیں ہے۔

‏مریم اورنگزیب کا بیان میں کہنا تھا کہ  عمران خان پاکستان کی معیشت سے خطرناک کھیل کھیل رہے ہیں،عمران صاحب یہ رنگ روڈ منصوبہ کی ری الائنمنٹ نہیں، پاکستان کی معیشت سے ‏خطرناک کھیل نہ کھیلیں،عوام معیشت کی تباہی کا اندازہ بے روزگاری ، مہنگائی ، آٹا چینی ، بجلی گیس دوائی ‏کی قیمتوں سے لگا سکتی ہے۔

مسلم لیگ ن کی ترجمان‎ کا کہنا ہے کہ ‎ عوام معیشت کی تباہی کا اندازہ سبزیاں ، پھل ، گوشت ، مرغی ، انڈے اور تیل کی ‏قیمتوں سے لگا سکتے ہیں،‎حکومت پہلے جھوٹ بولتی ہے، پھر یوٹرن لیتی ہے، پھر جھوٹ پہ جھوٹ بولتی ہے،‏11 جون کو حکومت کا یہ فراڈ ایک بار پھر کھل کر قوم کے سامنے آ جائے گا،‎‏3.94 فیصد گروتھ ریٹ کا دعوی قوم کے ساتھ کھلی جعلی سازی اور فراڈ ہے۔

مریم اورنگزیب کا کہنا تھا کہ  اختتام پزیر مالی سال میں سرمایہ کاری کے لحاظ سے جی ڈی پی میں 15.2 فیصد کمی ‏ہوئی ہے،‎ ‎نیشنل اکاونٹس کمیٹی نے سرمایہ کاری کے لحاظ سے جی ڈی پی میں کمی کی تصدیق ‏کی ہے، ‎حکومت تیسرے سال میں بھی سرمایہ کاری کے لحاظ سے جی ڈی پی کا ہدف حاصل ‏کرنے میں ناکام رہی ہے۔

 لیگی ترجمان کا بیان میں مزید کہنا تھا کہ  ‎ادارہ شماریات نے فی کس آمدن کے حوالے سے آبادی کے غلط اعدادوشمار استعمال ‏کیے ہیں ،ادارہ شماریات نے چھٹی مردم شماری کے حتمی جاری کردہ نتائج کو استعمال نہیں کیا،2017 میں چھٹی مردم شماری کے حتمی نتائج میں کل آبادی 20 کروڑ76 لاکھ 80 ‏ہزاردکھائی گئی ہے،22 کروڑ83 لاکھ 50 ہزار کی اصل آبادی کے بجائے 21 کروڑ10 لاکھ کا غلط عدد ‏دکھایاگیا۔انہوں نے کہا کہ ‏عمران صاحب سمیت کرائے کے ترجمان پہلے جھوٹ بولتے ہیں ، پھر جھوٹ بولتے ‏ہیں اور پھر یو ٹرن لینے پہ ہلکان ہوتے ہیں۔