سندھ میں پابندیاں مزید سخت ، نیا حکم نامہ جاری

تفصیلات کے مطابق وزیراعلیٰ سندھ مراد علی شاہ کی صدارت میں کورونا ٹاسک فورس کا اجلاس ہوا جس میں سندھ میں کورونا کی صورتحال کا جائزہ لیا گیا۔

 اجلاس میں فیصلہ کیا گیا کہ کاروبار کےاوقات کار صبح 5 بجے سے شام 6 بجے تک ہوں گے، بیکری اور ملک شاپ رات 12 بجے تک جبکہ ڈیپارٹمنٹل اور سپر اسٹور شام 6 بجے تک کھلے رہیں گے ،جمعہ اور اتوار کے دن کاروبار مکمل طور پربند رہیں گے۔مغرب کے بعد پارکس کی لائٹس بند کردی جائیں گی ۔

ترجمان وزیر اعلی سندھ کا کہنا ہے کہ شام 8 بجے کے بعد شہریوں کے باہر گھومنے پر پابندی عائد کی گئی ہے، کسی ایمرجنسی یا ضرورت کے بغیر باہر نکلنے سے گریز کریں۔اس سلسلے میں وزیراعلیٰ نے آئی جی سندھ کو ہدایت کی کہ شہریوں کو بلاضرورت گھومنے پھرنےسے روکا جائے۔

وزیرِاعلی سندھ مراد علی شاہ کا کہنا ہے کہ  پورے ملک میں جتنے کورونا کیسز ہیں انکا 50 فیصد سندھ میں ہے اگر دو ہفتے تک مقرر کردہ پابندیوں پرعمل کیا گیا تو کورونا کیسز میں نمایاں کمی آئے گی۔

وزیرِ اعلی نے کہا کہ نافذ کردہ پابندیوں کا جائزہ لینے کے لئے میں خود سرپرائز سروے کروں گا، اگر اوقات کی خلاف ورزی ہوئی توسخت کاروائی کی جائے گی۔

واضح رہے کہ سندھ میں گزشتہ 24 گھنٹوں میں ایک ہزار 529 نئے کیسز رپورٹ ہوئے جبکہ مزید 11 افراد  جان کی بازی ہار گئے، اب تک سندھ میں 3 لاکھ 9 ہزار 467 کورونا کیسز اور 4920 اموات رپورٹ ہوچکی ہیں۔