بانی چیئرمین پی ٹی آئی پر ہونے والا ظلم کسی سے ڈھکا چھپا نہیں، حامد خان

ہنما پاکستان تحریک انصاف (پی ٹی آئی) حامد خان نے کہا ہے کہ بانی پی ٹی آئی پر ہونے والا ظلم کسی سے ڈھکا چھپا نہیں۔

اسلام آباد میں پریس کانفرنس کرتے ہوئے حامد خان کا کہنا تھا کہ بانی پی ٹی آئی کو کئی ماہ سے پابند سلاسل کیا ہوا ہے، ہماری عدلیہ اپنا کام نہیں کر رہی، یہ جو ظلم ہو رہا ہے کسی سے ڈھکا چھپا نہیں،جو پہلے کبھی نہیں ہوا وہ بھی دیکھنے کو مل رہا ہے۔ ہمارے سامنے دیر رات تک عدالت کی کارروائی چل رہی ہوتی ہے جس کا مقصد مخصوص قوتوں کو خوش کرنا ہے۔

انہوں نے کہا کہ اپنی مرضی کے وکیل کی خدمات حاصل کرنے کی اجازت نہیں دی جا رہی، وکیل صفائی پر بندوقیں تانی جارہی ہیں، ملک میں نا انصافی اور زیادتی ہو رہی ہے۔ اس کے زیادہ فیئر ٹرائل کی خلاف ورزی نہیں ہو سکتی۔ہمارے آئینی حقوق کو جس انداز سے پامال کیا جا رہا ہے اور جس طرح آئین کے ساتھ کھلواڑ ہو رہا ہے یہ تاریخ کا ایک بہت افسوس ناک حصہ ہے۔

رہنما پی ٹی آئی کا مزید کہنا تھا کہ اس وقت ملک میں انسانی حقوق کی گھناؤنی صورتحال ہے، آپ انتظار نہ کریں کہ مظلوم خود عدالت میں بھاگ کر آئے، بنیادی حقوق کو پامال ہونے سے روکا جائے۔