لاہور ہائیکورٹ کے جسٹس شاہد جمیل خان نے اپنے عہدے سے استعفیٰ دے دیا

لاہور ہائیکورٹ کے جسٹس شاہد جمیل خان نے اپنے عہدے کی مدت پوری ہونے سے 5 سال قبل ہی استعفی دے دیا۔ جسٹس شاہد جمیل خان نے استعفیٰ صدر پاکستان عارف علوی کو ارسال کردیا۔

جسٹس شاہد جمیل خان نے ذاتی وجوہات کی بنا پر استعفیٰ دیا، وہ گزشتہ ڈیڑھ ماہ سے چھٹیوں پر تھے۔  سال 2014 میں لاہور ہائیکورٹ میں جج کے عہدے پر تعینات ہونے والے جسٹس شاہد جمیل سنیارٹی لسٹ میں 11 ویں نمبر پر تھے۔

انہوں نے اپنے استعفے میں لکھا کہ لاہور ہائیکورٹ کے جج کے منصب پر فائز میرے لیے اعزاز تھا، ذاتی وجوہات کی بنا پر عہدے سے مستعفی ہو رہا ہوں۔

آئین کے آرٹیکل 206 اے کے تحت مستعفی ہونے والے جسٹس شاہد جمیل خان نے مزید لکھا کہ، ’میں نے زندگی کا نیا باب شروع کرنے کا فیصلہ کیا ہے،جسکی وجہ سے عہدے سے مستعفی ہو رہا ہوں۔‘

جسٹس شاہد جمیل خان نے استعفیٰ صدر پاکستان عارف علوی کو ارسال کردیا،انہوں نے 2029 میں ریٹائر ہونا تھا۔

جسٹس شاہد جمیل خان نے اپنے استعفے میں  شاعر مشرق علامہ اقبال کے 4 اشعار بھی لکھے۔

آزاد کی اک آن ہے محکوم کا اک سال

کس درجہ گراں سیر ہیں محکوم کے اوقات

آزاد کا اندیشہ حقیقت سے منور

محکوم کا اندیشہ گرفتار خرافات

محکوم کو پیروں کی کرامات کا سودا

ہے بندہ آزاد خود اک زندہ کرامات

اقبال ! یہاں نام نہ لے علم خودی کا

موزوں نہیں مکتب کیلئے ایسے مقالات