ترکیہ کے ساتھ تعلقات کو مزید فروغ دینا چاہتے ہیں، یورپی یونین

برسلز: یورپی یونین نے ترکیہ کے ساتھ تعاون کو مختصر مدّت میں مزید فروغ دینے اور اختلافات کو ختم کرنے کا ہدف مقرر کیا ہے۔

ٹی آر ٹی کے مطابق یورپی یونین ممالک کے وزرائے خارجہ کا غیر سرکاری اجلاس یونین کے ٹرم چیئر مین ملک بیلجیم کے دارالحکومت برسلز میں منعقد ہوا۔

اجلاس کے ایجنڈے کے موضوعات میں سے ایک ترکیہ کے ساتھ باہمی تعلقات تھا۔ اجلاس کے اختتام پر یورپی یونین کے ہائی کمشنر برائے خارجہ تعلقات و سلامتی پالیسی جوزف بوریل اور بیلجیم کی وزیر خارجہ حجہ لحبیب نے مشترکہ پریس کانفرنس کی۔

پریس کانفرنس سے خطاب میں بوریل نے کہا ہے کہ یورپی یونین کے تمام رکن ممالک ترکیہ کے ساتھ مزید قریبی تعلقات قائم کرنے پر متفق ہیں۔

انہوں نے کہا کہ ترکیہ کے ساتھ تعلقات کو مزید فروغ دینا، مشترکہ مفادات کے شعبوں میں مل کر کام کرنا اور ایک دوسرے سے دور کرنے والے مسائل سے گریز کرنا ضروری ہے۔