الیکشن کمیشن نے نواز شریف کی انتخابی عذر کی درخواست مسترد کر دی

اسلام آباد: الیکشن کمیشن آف پاکستان (ای سی پی) نے پاکستان مسلم لیگ (ن) کے سربراہ میاں محمد نواز شریف کی انتخابی عذرداری کی درخواست مسترد کردی۔

تفصیلات کے مطابق سکندر سلطان راجہ کی زیر صدارت ای سی پی میں مانسہرہ کے حلقہ این اے 15 میں انتخابی عذرداری پر نواز شریف کی درخواست کی سماعت دو رکنی بنچ نے کی۔

نواز شریف کے وکیل الیکشن کمیشن میں نہ آ سکے جب کہ این اے 15 مانسہرہ کے ریٹرننگ افسر (آر او) نے اپنی رپورٹ الیکشن کمیشن میں جمع کرادی۔

آر او کے جواب کے مطابق این اے 15 کا نتیجہ فارم 45 کے مطابق اعلان کیا گیا ہے۔

نواز شریف کے وکیل تاخیر سے ای سی پی پہنچے اور استدعا کی کہ نواز شریف کی درخواست مسترد نہ کی جائے۔

تاہم سکندر سلطان نے نواز کے وکیل کو دوبارہ درخواست دائر کرنے کی ہدایت کی ہے، واضح رہے کہ این اے 15 مانسہرہ سے آزاد امیدوار شہزاد غصاصب کامیاب ہوئے ہیں۔