عمران خان کا رویہ ان کی حکومت جانے کا باعث بنا،شاہ زین بگٹی

جمہوری وطن پارٹی کے رہنما شاہ زین بگٹی نے مولانافضل الرحمان کے بیان پر ردعمل دیتے ہوئے کہاہے کہ بانی چیئرمین پی ٹی آئی کا رویہ ان کی حکومت جانے کا باعث بنا اور اسی رویے کے باعث وہ اکثر ارکان اسمبلی کی حمایت کھو چکے تھے۔

شاہ زین بگٹی کاکہناتھا کہ تحریک انصاف کی حکومت کو آئینی طریقے سے ہٹایا گیا ہے ،بانی پی ٹی آئی کارویہ اپوزیشن کے ساتھ ساتھ ان کی جماعت کے ارکان سے بھی آمرانہ تھا،پی ڈی ایم کی جماعتوں نے تحریک انصاف کے خلاف تحریک عدم اعتماد لانے کا فیصلہ کیا تھا،پی ٹی آئی مصنوعی طاقت کی چھتری تلے حکومت کر رہی تھی۔

رہنما جمہوری وطن پارٹی نےکہا کہ ہم نے پی ڈی ایم کی حکومت کو کہا تھا کہ اب جبکہ عدم اعتماد کامیاب ہو چکی ہے تو 16 ماہ کی حکومت لینے کی بجائے فوری الیکشن کی طرف جانا چاہیے لیکن پیپلز پارٹی اور مسلم لیگ ن اس کے حق میں نہیں تھے لیکن بلوچستان کی باقی تمام قوم پرست جماعتوں کا ایک ہی موقف تھا کہ ہم نے الیکشن کی طرف جانا ہے۔