ہمارے مینڈیٹ پر ڈاکا ڈالا گیا، شیر افضل مروت

تحریک انصاف کے رہنما شیر افضل مروت نے کہا ہے کہ ہمارے مینڈیٹ پر ڈاکا ڈالا گیا، سپریم کورٹ میں کیس دائر کر دیا ہے توقع کرتے ہیں کہ ہمیں انصاف ملے گا۔ پوری قوم کی امیدیں عدلیہ سے واپستہ ہیں، فل کورٹ بنا دیا جائے تو بہتر ہو گا۔

اسلام آباد ہائیکورٹ میں میڈیا سےگفتگو کرتے ہوئے انہوں نے کہا کہ 8 ماہ سے بانی چیئرمین پی ٹی آئی سے ملاقات دو فرشتوں کے بغیر نہیں ہوئی، ہر ملاقات میں اہلکار موجود ہوتے ہیں، وہ اہلکار ہماری تمام گفتگو سنتے ہیں۔

شیر افضل مروت نے کہا کہ قانون کے مطابق وکیل اور مؤکل کے درمیان بات چیت میں کوئی حائل نہیں ہو سکتا، عدالت نے حکم دیا ہے کہ آئندہ بانیٔ پی ٹی آئی اور وکلاء کی ملاقات کے دوران گفتگو کوئی نہیں سنے گا۔ الیکشن کے دونوں میں ہمیں بہت تکلیف ہوئی۔

انہوں نے کہا کہ جیل حکام کا مؤقف ہے کہ ہفتے میں صرف 2 ملاقاتیں ہو سکتی ہیں، تاہم عدالت نے جیل حکام کے اس مؤقف کو مسترد کر دیا ہے، عدالت نے پیر سے ہفتے تک بانیٔ پی ٹی آئی سے ملاقات کرانے کا حکم دے دیا ہے۔

انہوں نے کہا کہ الیکشن کے دنوں میں ہمارے کاغذات لے لیے جاتے تھے، بہت ساری اہم معلومات خان صاحب تک نہیں پہنچنے دی گئیں، سپریم کورٹ میں ہم نے انتخابات سے متعلق  کیس دائر کیا ہے، مینڈیٹ پر جو ڈاکہ ڈالا ہے ہم توقع کرتے ہیں سپریم کورٹ اسے واپس کرے گی۔

شیر افضل کا کہنا تھا کہ عمر ایوب سے کوئی اختلافات نہیں، جب بھی ملوں گا بغلگیر ہو کر ملوں گا۔ ایک صحافی نے سوال کیا کہ بڑی تعداد میں آزاد امیدوار سنی اتحاد کونسل میں شامل نہ ہو سکے، یہ کدھر جائیں گے ، شیرافضل مروت نے جواب دیا کہ یہ سنی اتحاد کونسل میں ہی جائیں گے۔