خواتین کے عالمی دن کے موقع پر ریسکیو 1122 ہیڈ کوارٹر میں تقریب کا اہتمام

پنجاب ایمرجنسی سروس (ریسکیو 1122)ہیڈ کوارٹرز میں ریسکیو سروس میں پیشہ وارانہ خدمات سر انجام دینے والی خواتین کی گراں قدر خدمات کے اعتراف میں خواتین کے عالمی دن کے موقع پر ایک پر وقار تقریب کا اہتمام ہوا جس کی صدارت سیکرٹری ایمرجنسی سروسز، ڈاکٹر رضوان نصیر نے کی۔

خواتین کے عالمی دن کے حوالے سے ایمرجنسی سروسز ہیڈ کوارٹرز میں منعقدہ تقریب سے خطاب کرتے ہوئے ڈاکٹر رضوان نصیر نے تمام ریسکیو خواتین خصوصا زندگی بچانے والی ایمرجنسی سروس میں خدمات انجام دینے والی خواتین کو زبردست خراج تحسین پیش کیا۔ پنجاب میں اب ہماری پہلی خاتون وزیر اعلیٰ ہیں جو خواتین کو بااختیار بنانے کا سمبل ہیں، ریسکیو کا خیال ہے کہ خواتین کو آزادانہ نقل و حرکت فراہم کی جائے تاکہ انہیں خود مختار بنایا جا سکے اس سلسلے میں ہم حکومت پنجاب کو بلاسود اسکوٹیز فراہم کرنے کی تجویز پیش کریں گے تاکہ خواتین ریسکیورز آزادانہ طور پر نقل و حرکت کر سکیں۔

تقریب سے خطاب کرتے ہوئے ڈاکٹر رضوان نصیر نے ہیڈ کوارٹرز، اکیڈمی اور آپریشنز میں خواتین افسران،اہلکاروں اوردیگر سٹاف کے کردار کو سراہا۔ انہوں نے کہا کہ خواتین کو بااختیار بنانا ہی ہے کہ خواتین ریسکیو آفیسر محترمہ دیبہ شہناز ہیڈ آف کمیونٹی سیفٹی اینڈ انفارمیشن ریسکیو پنجاب بھی جنوبی ایشیاء میں اقوام متحدہ سے سرٹیفایئڈ ریسکیو ٹیم کا حصہ ہیں۔ اس کے علاوہ انہوں نے پنجاب بھر میں ٹریننگ اور کنٹرول رومز کے شعبے میں ایمبولینس میں کام کرنے والی خواتین ریسکیورز کو سراہا۔