نواز شریف کے دونوں صاحبزادوں کے وارنٹ گرفتاری منسوخ

احتساب عدالت نے نواز شریف کے دونوں صاحبزادوں کے وارنٹ گرفتاری منسوخ کر دیئے۔جج ناصر جاوید رانا نے حسن نواز اور حسین نواز کے خلاف فلیگ شپ، العزیزیہ اور ایون فیلڈ ریفرنسز پر وارنٹ منسوخی پر سماعت کی جس میں عدالت نے دونوں کے وارنٹ گرفتاری منسوخ کرکے  ضمانت منظور کرلی۔

مسلم لیگ ن کے قائد نواز شریف کے صاحبزادے حسن نواز اور حسین نواز کی درخواستوں پر احتساب عدالت میں سماعت ہوئی ، احتساب عدالت کےجج ناصر جاوید نے سماعت کی۔

حسن نواز اور حسین نواز احتساب عدالت میں پیش ہوئے، طارق فضل چوہدری بھی حسن اور حسین نواز کے ہمراہ کمرہ عدالت میں موجود تھے۔ احتساب عدالت نے دائمی وارنٹ گرفتاری 14 مارچ تک کیلئے معطل کیے تھے، حسن اور حسین نواز کی تینوں ریفرنسز میں الگ الگ حاضری لگوائی گئی۔

احتساب عدالت نے حسین نواز اور حسن نواز کی ضمانت منظورکرلی، عدالت نے 50 ہزار کی مچلکوں کی عوض ضمانت منظور کی اور کیس کی سماعت کل تک کےلئے ملتوی کردی۔عدالت نے پاناما ریفرنسز میں حسن ،حسین نواز کے اشتہاری کا اسٹیٹس بھی ختم کردیا۔

کمرہ عدالت میں غیر رسمی گفتگو کرتے ہوئے حسین نواز کا کہنا تھا کہ نیب کیس ختم ہو چکا ہے لیکن آج تک نہیں پتا کہ ان کے خلاف مقدمہ تھا کیا، ہمارا سیاست اور حکومت سے کوئی تعلق نہیں، ہمیں علم نہیں کہ حکومت چلے گی یا نہیں۔عمران خان کے حوالے سے کچھ نہیں کہوں گا میرے کہنے سے کونسا سمجھ جائیں گے، لیکن ہر شخص کو شفاف ٹرائل کا حق ملنا چاہیے، ایک ایسا فول پروف نظام ہونا چاہیے، جس میں سب کو انصاف مل سکے۔

حسین نواز کا کہنا تھا کہ انہیں والدہ کی تدفین میں شریک نہ ہونے کا بہت بڑا دکھ ہے، 12 اکتوبر 1999 سے ان کے خلاف سیاسی انتقام کا آغاز کرتے ہوئے 14 ماہ قید تنہائی میں رکھا گیا اور کسی مقدمے کے بغیر جلاوطن کردیاگیا، ان کا اور حسن نواز کا کسی حکومت سے تعلق نہیں۔

حسین نواز نے کہا کہ  ذاتیات پر کردار کشی کرنا ختم ہونا چاہیے،ہم نے کبھی پاکستانی شہریت سے انکار نہیں کیا، وہ پاکستانی شہری ہیں، جو ہمارے ساتھ ہوا وہ سب آپ کے سامنے ہے۔