جہوریت کا راگ الاپنے والی ن لیگ صوبے کو بادشاہت کی طرز پر چلا رہی ہے، یاسمین راشد

پاکستان تحریک انصاف کے رہنما و سابق صوبائی وزیر ڈاکٹر یاسمین راشد نےکہا ہے کہ جہوریت کا راگ الاپنے والی مسلم لیگ ن صوبے کو بادشاہت کی طرز پر چلا رہی ہے۔ سوال اٹھایا ہے کہ نواز شریف نے کس حیثیت میں پنجاب حکومت کی میٹنگ کی صدارت کی؟

ڈاکٹر یاسمین راشد نے انسداد دہشت گردی عدالت لاہور میں پیشی کے موقع پر میڈیا سےغیر رسمی گفتگو کرتے ہوئے کہا کہ جمہوریت کا راگ الاپنے والی ن لیگ پنجاب کو بادشاہت کی طرز پر چلا رہی ہے، نواز شریف سے سرکاری اجلاس کی صدارت کراکے مریم نواز نے ثابت کر دیا کہ وہ اپنے خاندان کو قانون سے بالا تر سمجھتی ہے۔

انہوں نے کہا کہ نواز شریف ایک متنازع رکن قومی اسمبلی ہیں،  اُن کی قومی اسمبلی کی متنازعہ سیٹ کا کیس عدالتوں میں ہے،جس پر ابھی فیصلہ ہونا باقی ہے۔ انہوں نے کس حیثیت سے سرکاری اجلاس کی صدارت کی ہے۔مریم نواز اپنی کہی بات کو سچ ثابت کر رہی ہیں کہ ہم حکمران خاندان ہیں،

یاسمین راشد نے مزید کہا کہ پنجاب سے ایک آئینی وزیر اعلی خیبر پختون خوا کے وارنٹ گرفتاری جاری کروائے گئے، صوبوں میں تصادم میں کروانے کی کوشش کی گئی ہے، ملک میں افراتفری ، بے چینی بے یقینی کی صورتحال ہے، عدلیہ سے اُمید ہے کہ وہ ان حالات پر نوٹس لے۔