الیکشن کمیشن کا سینٹ انتخابات سے متعلق 8 نکاتی ضابطہ اخلاق جاری

الیکشن کمیشن نے سینٹ انتخابات میں حصہ لینے والے امیدواروں،جماعتوں،پولنگ ایجنٹوں اور ووٹروں کے لئے 8 نکاتی ضابطہ اخلاق جاری کردیا ہے۔

الیکشن کمیشن کی جانب سے جاری ضابطہ اخلاق کے مطابق اسلام کی شان،پاکستان کی سالمیت، خودمختاری،سلامتی اور نظریہ پاکستان کا احترام لازم اور اس کے خلاف کوئی بات یا اقدام اٹھانے کی ممانعت ہوگی۔پارلیمنٹ،عدلیہ اور افواج پاکستان کے خلاف کسی قسم کی توہین کی ممانعت ہوگی۔

صدر اور گورنرز انتخابی مہم میں حصہ نہیں لے سکیں گے۔امیدوار مہم کے دوران اخراجات کے لئے خصوصی اکائونٹ کھلوائیں گے۔اگر پہلے سے موجود اکائونٹ کو اس مقصد کے لئے استعمال کیاجائے تو اس کی سٹیٹمنٹ کاغذات نامزدگی جمع کرواتے وقت ریٹرننگ افسران کو جمع کروانی لازم ہوگی۔

ضابطہ اخلاق کے مطابق پولنگ بوتھ کے اندر موبائل فون،کیمرہ یا ایسا آلہ جس سے بیلٹ پیپرز کی تصویر لی جاسکے لے جانے پر پابندی ہوگی۔