پاکستان کی معاشی صورتحال کے استحکام میں مدد کریں گے ، چین

چین کے نائب وزیر اعظم ژانگ گوکنگ نے کہا ہے کہ ان کا ملک پاکستان کی معاشی صورتحال کے استحکام میں مدد کرے گا۔

انہوں نے یقین دہانی برسلز میں پہلے جوہری توانائی سربراہ اجلاس کے موقع پر وزیر خارجہ اسحاق ڈار سے ملاقات میں کرائی ، چین کے نائب وزیراعظم نے سی پیک منصوبے میں توسیع اور صنعت، کان کنی اور انفارمیشن ٹیکنالوجی سمیت مختلف شعبوں میں پاکستان کے ساتھ تعاون مزید مستحکم کرنے کی خواہش ظاہر کی۔

نائب وزیر اعظم ژانگ GUOQING اور وزیر خارجہ اسحاق ڈار نے چین پاکستان سدابہار تزویراتی تعاون پر مبنی تعلقات اور آہنی دوستی کو بے مثال اور منفرد رشتہ قرار دیا۔

فریقین نے دونوں ملکوں کے درمیان سول ایٹمی ٹیکنالوجی میں دیرینہ تعاون کی اہمیت پر اتفاق کیا ، اسحاق ڈار نے ایک چین کی پالیسی کیلئے پاکستان کی مسلسل حمایت کا اعادہ کیا۔

انہوں نے کہا کہ چین کے ساتھ تعلقات اور چین پاکستان اقتصادی راہداری کے دوسرے مرحلے کیلئے پاکستان کے مضبوط عزم پر ملک میں مکمل اتفاقِ رائے پایا جاتا ہے۔