رمضان میں عوام کےریلیف کےلئے کوششیں کر رہے ہیں،وفاقی وزیر صنعت و پیداوار

وفاقی وزیر صنعت و پیداوار رانا تنویر حسین رمضان میں عوام کےریلیف کےلئے کوششیں کر رہے ہیں، پنجاب میں مریم نواز نے رمضان نگہبان پیکج شروع کیا ہے، وزیر اعظم نے رمضان پیکج کو ساڑھے 7 ارب سے بڑھا کر ساڑھے 12 ارب روپےکر دیا ہے۔

مختلف یوٹیلیٹی سٹورز کا دورہ کے موقع پر میڈیا سے گفتگو کرتے ہوئے وفاقی وزیر نے کہا کہ وفاقی حکومت نے یوٹیلیٹی سٹورز کارپوریشن کے ذریعے وزیراعظم رمضان ریلیف پیکیج کیلئے ساڑھے بارہ ارب روپے کی تاریخی سبسڈی فراہم کی ہے اور ملک بھر کے تمام یوٹیلیٹی سٹورز پر غریب اور متوسط طبقے کی عوام کو 19بنیادی اشیا رعایتی قیمتوں پر فراہم کی جا رہی ہیں۔ بے نظیر انکم سپورٹ پروگرام میں رجسٹرڈ تقریبا 4 کروڑخاندان اس پیکیج سے مستفید ہو سکیں گے۔ 

وفاقی وزیر نے کہا کہ یوٹیلیٹی سٹورز کارپوریشن کی انتظامیہ اور ورکرز پوری تندہی سے دن رات محنت کر کے رمضان پیکیج کے ثمرات کو عوام تک کامیابی سے پہنچانے کے لیے سرگرم عمل ہیں ،ملک کے تمام یوٹیلیٹی سٹورز پر اشیائے خوردو نوش کی وافر مقدار میں فراہمی کو یقینی بنایا گیا ہے۔ ڈیڑھ برس مشکل ہے اس کے بعد مہنگائی کم ہو جائے گی، امید ہے 2025 کے آخر تک مہنگائی سنگل ڈیجٹ پر لے آئیں گے۔

انہوں نے کہاکہ یوٹیلیٹی سٹورز پر کسی بھی چیز کی کوئی کمی نہیں ہے،رمضان پیکج کے تحت سپلائی کی جانے والی اشیا کا معیار برقرار رکھنے کے لئے یوٹیلٹی سٹورز نے کوالٹی ایشورنس کا ایک باقاعدہ نظام مرتب کیا ہے جس کے تحت اشیا کی بہترین کوالٹی کی مسلسل نگرانی کی جاتی ہے۔

وفاقی وزیر نے کہا کہ رمضان پیکیج کی مانیٹرنگ کے لئے جدید نظام بنایا گیا ہے، ملک کے تمام یوٹیلیٹی سٹورز کی سی سی ٹی وی کیمروں کے ذریعے نگرانی کی جاتی ہے جبکہ مانیٹرنگ اور ویجیلنس کی ٹیمیں پورے ملک میں فعال ہیں۔مہنگائی کے حوالے سے ایک سوال پر وفاقی وزیر صنعت و پیداوار نے کہا کہ حکومت اس پر سنجیدگی سے کام کر رہی ہے اور آئندہ سال مہنگائی کی شرح سنگل ڈیجیٹ تک لے آئیں گے۔