غزہ جنگ کی وجہ سے اسرائیل بہت زیادہ عالمی حمایت کھو رہا ہے، ڈونلڈ ٹرمپ

سابق امریکی صدر ڈونلڈ ٹرمپ نے خبردار کیا ہے کہ اسرائیل غزہ میں جنگ کی وجہ سے بہت زیادہ عالمی حمایت کھو رہا ہے۔ انہوں نے غزہ میں جاری جنگ فوری ختم کرنے کا مطالبہ کیا۔

اسرائیل ہیوم اخبار کو دیئے گئے انٹرویو میں ٹرمپ نے کہا کہ آپ کو جنگ کو ختم کرنا ہوگا۔ اسرائیل کو بہت محتاط رہنا چاہیے کیونکہ آپ دنیا کے ایک بڑے حصے کی حمایت کھو رہے ہیں۔ آپ بہت زیادہ حمایت کھو رہے ہیں۔ جنگ ختم ہونی چاہیے۔

جب ان سے پوچھا گیا کہ وہ حماس کے حملے کا کیا جواب دیتے، جس پر ٹرمپ نے کہا کہ  "میں بھی اسی طرح جواب دیتا جس طرح اسرائیل نے جواب دیا"، لیکن انہوں نے اس جنگ کے تاثر یا عوامی تصویر پر تشویش کا اظہار کیا جس میں اسرائیلی حملے غزہ کی پٹی کو زیادہ تر ملبے میں تبدیل کر دیا ہے۔

حماس کی وزارت صحت کے مطابق اسرائیلی فوج کی طرف سے جوابی حملے میں اب تک غزہ میں 32 ہزار 333 افراد ہلاک ہو چکے ہیں، جن میں زیادہ تر عام شہری ہیں۔