عالمی ادارہ صحت نے کورونا کی مختلف اقسام کو نئے نام دے دیے

تفصیلات کے مطابق عالمی ادارہ صحت (ڈبلیو ایچ او ) نے دنیا بھر میں پائی جانے والی کورونا وائرس کی اقسام کو مختلف نام دیئے ہیں۔ یہ فیصلہ کورونا اقسام سے منسلک ممالک کے منفی تاثر کو زائل کرنے اور بات چیت کو آسان بنانے  کیلئے کیا گیا ہے۔گزشتہ برس دسمبر سے اب تک کورونا وائرس کی کئی نئی اقسام سامنے آ چکی ہیں، جو سب سے  پہلے سامنے آنے والے کورونا وائرس کے مقابلے میں کئی زیادہ متعدی ہیں۔ خبرایجنسی کے مطابق عالمی ادارہ صحت نے کورونا وائرس کی برطانوی قسم کوایلفا اور جنوبی افریقی قسم کوبیِٹا کا نام دیا ہے۔جبکہ کورونا وائرس کی برازیلین قسم کو گاما اور بھارتی قسم کوڈیلٹا کہا جائے گا۔

واضح رہے کہ د نیا کا کوئی خطہ کورونا وائرس کی  وباء سے محفوظ نہیں، اس کی تیسری لہر کے دوران مریضوں اور اموات میں مسلسل اضافہ جاری ہے۔دنیا بھر میں کورونا وائرس سے متاثرہ افراد کی تعداد 17 کروڑ 14 لاکھ 75 ہزار سے تجاوز کر چکی ہے جبکہ اس وبا  سے اموات 35 لاکھ 65 ہزار 352 تک جاپہنچی ہیں ۔کورونا وائرس کے کیسز اور اس سے اموات کے اعتبار سےامریکا تا حال پہلے نمبر پر ہے جہاں اس وائرس سے اب تک 6 لاکھ 9 ہزار 767 افراد موت کے منہ میں پہنچ چکے ہیں جبکہ اس سے بیمار ہونے والوں کی مجموعی تعداد 3 کروڑ 41 لاکھ 13 ہزار 146 ہو چکی ہے۔

ایک ارب سے زائد آبادی والا ملک بھارت کورونا وائرس کے مریضوں کی تعداد کے حوالے سے دوسرے نمبر پر ہے، جہاں اس وائرس سے 3 لاکھ 31 ہزار 909 ہلاکتیں ہو چکی ہیں جبکہ اس سے متاثرہ 2 کروڑ 81 لاکھ 75 ہزار 44 مریض سامنے آ چکے ہیں۔کورونا وائرس کے مریضوں کی تعداد کے حوالے سے ممالک کی اس فہرست میں برازیل تیسرے نمبر پر ہے جہاں اس جان لیوا وائرس سے 4 لاکھ 62 ہزار 966 ہلاکتیں ہو چکی ہیں جبکہ اس کے متاثرہ مریضوں کی تعداد 1 کروڑ 65 لاکھ 47 ہزار 674 ہو گئی۔