بھارت کو مقبوضہ کشمیرکی خصوصی حیثیت بحال کرنا پڑےگی: وزیر خارجہ

تفصیلات کے مطابق ایک بیان میں وزیر خارجہ شاہ محمود قریشی   نے کہا کہ کامیاب خارجہ پالیسی کی بدولت دنیا اب پاکستان کا ایک مسئلے کے طور پر نہیں بلکہ ایک حل کے حصے کے طور پر اعتراف کرتی ہے۔انہوں نے کہاکہ بھارت کو بدترین داخلی صورتحال کی وجہ سے بھر پور دبائو کا سامنا ہے۔اعدادوشمار کے مطابق بھارت  میں 230 ملین آبادی غربت کی لکیرسے نیچےرہ رہی ہے ۔ہندوستان کی معیشت، غلط پالیسیوں کی وجہ سے 7.3فیصد تک سکڑ گئی ہے ۔صرف اپریل کے مہینے میں 73 لاکھ لوگ ہندوستان میں بے روزگار ہوئے ہیں۔

اپنے حالیہ دورہ عراق سے متعلق شاہ محمود قریشی نے بتایا کہ عراق او آئی سی کا اہم ملک ہے اور مشرق وسطیٰ میں قیام امن کے حوالے سے عراق کا کردار اہمیت کا حامل  ہے ۔ انہوں نے اپنے عراقی ہم منصب کو بھارت کے غیر قانونی زیر قبضہ جموں و کشمیر کی صورتحال سے متعلق آگاہ کیا ہے، انہوں نے کہا کہ پاکستان خطے میں امن کا خواہاں ہے۔

وزیر خارجہ نے کہا کہ فلسطین کے حوالے سے “سیز فائر” کی صورت میں ابتدائی کامیابی ملی ۔ او آئی سی کی جانب سے پاکستان نے اقوام متحدہ ہیومن رائٹس کونسل میں قرارداد پیش کی،  وزیرخارجہ نے کہا کہ یواے ای کیساتھ پاکستان کے اچھے تعلقات ہیں۔مستقبل میں یو اے ای سے مزیدمضبوط تعلقات چاہتے ہیں۔وزیر اعظم عمران خان صاحب کی بھی یو اے ای کے ولی عہدسے بات چیت ہوئی۔ شاہ محمودقریشی نے کہا کہ پہلے افغانستان میں کچھ بھی ہوتا تھا تو اس کا الزام پاکستان پرلگا دیا جاتاتھا، آج ہماری کامیاب خارجہ پالیسی کے باعث، دنیا پاکستان کو مسائل کا حصہ نہیں بلکہ مسائل کے حل کا حصّہ سمجھتی ہے۔