پی ٹی آئی کارکنان کی مشکلات میں اضافہ، ضمانت کے بعد دوبارہ زیر حراست

پی ٹی آئی کارکنان ک مشکلات میں کمی نہ آئی، 9 مئی کے مقدمات میں عدالت سے رہائی حاصل کرنے والوں کو دوبارہ حراست میں لے لیا گیا۔

انسداد دہشت گردی کی عدالت سے ضمانت پانے والے پی ٹی آئی کے 8 کارکنان کو دوبارہ حراست میں لے لیا گیا جبکہ  سپریم کورٹ سے ضمانت حاصل کرنے والے 5 ملزمان کو بھی ایم پی او کے تحت دوبارہ حراست میں لے لیا گیا۔

پی ٹی آئی کارکنوں کو کے خلاف حساس ادارے کے دفتر کے گیٹ پر حملہ کرنے کا مقدمہ درج کیا گیا ہے۔ مقدمہ درج ہونے کے بعد پاکستان تحریک انصاف ( پی ٹی آئی ) کے 8 کارکنوں کو دوبارہ حراست میں لے لیا گیا۔ زیر حراست کارکنان میں اسد اللہ،ابرار،رضوان اللہ ،احمد علی،سجاد حیدر، اصف علی، رضوان عظمت اور سہیل طاہر شامل ہیں۔

پی ٹی آئی کے ان 8 کارکنوں کو ضمانت ملنے پر جیل رہا کیا گیا تھا۔ پی ٹی آئی کارکنوں کو ڈی سی راولپنڈی کی ہدایت پر حراست میں لیا گیا۔ انسداد دہشت گردی عدالت کے جج ملک اعجاز آصف نے گزشتہ روز پی ٹی آئی کارکنان کی ضمانت منظور کی تھی۔

دوسری طرف 9 مئی کے مقدمے میں سپریم کورٹ سے ضمانت حاصل کرنے والے 5 ملزمان کو بھی دوبارہ گرفتار کر لیا گیا۔ پولیس کے مطابق پانچوں ملزمان کو 16 ایم پی او احکامات کے تحت گرفتار کیا گیا، ایم پی او کے احکامات ڈپٹی کمشنر راولپنڈی نے جاری کئے ہیں۔ پانچوں گرفتار ملزمان کے خلاف تھانہ نیو ٹاؤن میں 9 مئی کا مقدمہ درج ہے۔

یاد رہے کہ سپریم کورٹ نے 20 مارچ کو ملزمان کی ضمانت منظور کی تھی اور ملزمان کو انسداد دہشت گردی عدالت میں مچلکے جمع کرانے کے بعد گزشتہ رات اڈیالہ جیل سے رہا کیا گیا تھا۔ گزشتہ روز سپریم کورٹ نے 5 جبکہ انسداد دہشتگردی عدالت نے 19 ملزمان کی ضمانت منظور کی تھی۔