وزیراعلیٰ خیبرپختونخوا نے صوبائی کابینہ کا اہم اجلاس آج طلب کر لیا

وزیراعلیٰ خیبرپختونخوا نے صوبائی کابینہ کا اہم اجلاس آج طلب کر لیا، صوبائی حکومت نے وفاق کے ساتھ مالی مسائل مستقل بنیادوں پرحل کرنے کا فیصلہ کر لیا۔

وزیراعلیٰ خیبرپختونخوا علی امین گنڈاپور کی زیر صدارت اجلاس شام ساڑھے 8 بجے طلب کیا گیا ہے۔

اعلامیہ کے مطابق اجلاس میں مختلف محکموں کے وزراء، مشیر اور معاونین خصوصی شرکت کریں گے، اجلاس میں چیف سیکرٹری، آئی جی پولیس اور متعلقہ محکموں کے اعلیٰ افسران بھی شریک ہونگے۔اجلاس میں امن و امان اور صوبے کے معاشی صورتحال پر بات چیت ہوگی۔

ذرائع کے مطابق اجلاس میں رمضان پیکیج کے تحت تقسیم ہونے والی رقوم کا جائزہ بھی لیا جائے گا، صوبے کے مالی، انتظامی اور دیگر امور پر بھی بحث کی جائے گی اور ساتھ ہی صوبائی حکومت نے مالی مسائل کے مستقل بنیادوں پرحل کیلئے وزیراعظم شہباز شریف کو خط لکھنے کا فیصلہ کیا ہے۔

ذرائع نے بتایا ہے کہ فاقی محکموں کے ساتھ مالی معاملات پربات چیت کی جائے گی اور وفاق کے ساتھ ابتدائی طور پر 7 اہم مسائل اٹھائے جائیں گے جن میں سے ضم اضلاع کا ترقیاتی بجٹ جاری کرنے کا معاملہ ترجیحی بنیادوں پراٹھایا جائے گا۔