بلوچستان کی وکلاء تنظیموں نے ججز خط پر حکومتی کمیشن مسترد کر دیا

پی ٹی آئی اور بلوچستان کی وکلاء تنظیموں نے حکومتی کمیشن کو مسترد دیا۔

وکلاء تنظیموں کا مشترکہ اجلاس  ممبر پاکستان بارکونسل احمد کاکڑ کی زیر صدارت ہوا، اعلامیہ میں کہا گیا ہے کہ کسی بھی ریٹائرڈ جج کی سربراہی میں قائم کمیشن قابل قبول نہیں، اسلام آباد ہائیکورٹ کے چھ ججز کے خط پر از خود نوٹس لے کر فل کورٹ سماعت کی جائے، بلوچستان کے وکلاء جوڈیشنری کی آزادی پر قدغن نہیں لگنے دینگے ۔

دو اپریل کو منعقد اجلاس میں مشترکہ طور پر آئندہ کا لائحہ عمل طے کیا جائے گا۔  سپریم کورٹ بار اور پنجاب بار کونسل نے جسٹس (ر) تصدق  حسین جیلانی کی بطور سربراہ تحقیقات کمیشن نامزدگی کو خوش آئند قرار دے دیا، پنجاب بار کونسل نے کہا کہ جسٹس (ر) تصدق حسین جیلانی غیر متنازع جج کے طور پر مانے جاتے ہیں، امید ہے تصدق حسین جیلانی معاملے کی انکوائری غیر جانبداری سے مکمل کریں گے۔

بلوچستان بار کونسل، کوئٹہ بار کونسل اور کوئٹہ ایگزیکٹیو ہائی کورٹ کے اراکین نے مشترکہ طور پر ایک ریٹائرڈ جج کی سربراہی میں ججز کے خط کی تحقیقات کے لئے بننے والی تحیقیاتی کمیشن کو مسترد کرنے کا اعلان کیا۔

پی ٹی آئی رہنما شیر افضل مروت نے کہا مشاورت کے بعد انکوائری کمیشن کی تشکیل کو چیلنج کریں گے  جبکہ چیئرمین پی ٹی آئی بیرسٹر گوہر نے صرف حاضر سروس ججوں کا کمیشن بنایا جائے، میمو گیٹ سکینڈل، الیکشن انکوائری کی طرح کمیشن تشکیل دیا جائے۔

جے یو آئی (ف) نے کہا ہے کہ ججز کے خط کے معاملہ پر ملک گیر وکلاء کنونشن  کرائے گی۔ ترجمان کے مطابق تاریخوں کا اعلان جلد کیا جائے گا۔