عید سے قبل پٹرولیم مصنوعات کی قیمتوں میں اضافے کا امکان

عید سے قبل پیٹرولیم مصنوعات کی قیمتوں میں بڑے اضافے کا امکان، سمری وزارت پیٹرولیم کو ارسال کردی گئی۔

یکم اپریل سے اوگرا کی جانب سے اگلے 15روز کیلئے پیٹرولیم مصنوعات کی قیمتوں میں ردبدل کی سمری بھجوائی گئی۔ پیٹرول کی قیمت میں 10 سے11 روپے فی لیٹر تک اضافے کا امکان ہے، جبکہ ہائی اسپیڈ ڈیزل کی قیمت میں2 روپے فی لیٹر تک کمی کا امکان ہے۔

اوگراورکنگ کے لحاظ سے قیمتوں میں اضافہ کاسبب درآمدی پریمیم اور عالمی قیمتوں میں اضافہ ہے، پیٹرول کی درآمدی قیمت میں تقریباً 4 ڈالر فی بیرل کا اضافہ ہوا ہے۔ پیٹرول کی درآمد پر پریمیم 13.5 ڈالر فی بیرل تک پہنچ گیا،اس سےپہلے یہ پریمئم 12.15 ڈالر فی بیرل تھا، ڈالر روپے کے مبادلہ کے حساب سے پیٹرول میں 10 سے 11 روپے فی لیٹر اضافے بنتا ہے۔

پیٹرول کی موجودہ قیمت تقریباً 280 روپے فی لیٹر ہے، متوقع اضافے کے بعد اس کی قیمت 290 روپے فی لیٹر ہو جائیگی۔ عالمی مارکیٹ میں ڈیزل کی قیمتیں کم ہوئی ہیں،پی ایس او کا درآمدی پریمیم 6.50 ڈالر فی بیرل پر برقرار رہا، ہائی اسپیڈ ڈیزل کی قیمت میں 1.30 روپے سے 2.50 روپے فی لیٹر تک کمی کا تخمینہ لگایا گیا ہے۔