ورلڈ بینک کا پاکستان سے بڑا مطالبہ

ورلڈ بینک نے پاکستان سے بجلی اور گیس کے نرخوں میں اضافے کے ساتھ ساتھ پنشن اصلاحات کا بھی مطالبہ کر دیا۔

ورلڈ بینک نے پنشن ریفارمز پر اپنی پاکستان ڈیولپمنٹ اپڈیٹ میں وفاقی اور صوبائی پبلک سیکٹر پنشن سے پیدا ہونے والے مالیاتی بوجھ کو کم کرنے کے لیے اصلاحات کو فوری طور پر متعارف کرانے کا مطالبہ کیا ہے۔

ورلڈ بینک کے مطابق، طویل مدتی مالیاتی استحکام کو یقینی بنانے کے لیے پنشن اصلاحات کے منصوبے کو تیار کرنے اور اس پر عمل درآمد کے لیے ابتدائی اقدامات کیے جانے چاہئیں۔ پبلک سیکٹر کے معاوضے کو معقول بنانے کے لیے اصلاحاتی منصوبے کے تحت ابتدائی اقدامات کیے جائیں۔

ورلڈ بینک نے بجلی گیس سیکٹر میں نرخوں کے حوالے سے اصلاحات کو رسدی لاگت کے ساتھ منسلک رکھنے کا بھی مطالبہ کیا ہے تاکہ بجلی اور گیس کے شعبے میں بڑھتے ہوئے گردشی قرضے کو محدود کیاجاسکے اور غریبوں کو سوشل پروٹیکشن کو بڑھا کر تحفظ دیاجائے۔

پرسنل انکم ٹیکس (PIT) ریونیو ریفارمز پر، ورلڈ بینک نے تنخواہ دار اور غیر تنخواہ دار ملازمین کے لیے اسکیموں کو ہموار کرکے پیچیدگی کو کم کرنے کے لیے ذاتی انکم ٹیکس کے نظام میں اصلاحات کا بھی مطالبہ کیا ہے۔

ورلڈ بینک کے مطابق، قابل ٹیکس آمدنی کے ذرائع کے درمیان شرح کے ڈھانچے کو ہم آہنگ کرتے ہوئے اور مراعات یافتہ طبقے کو ختم کرکے ایکویٹی بڑھانے کے لیے مخصوص ذرائع آمدن کا علاج کرتے ہوئے PIT شیڈولز میں اصلاح کی جانی چاہیے۔

ورلڈ بینک نے اپنی رپورٹ میں سماجی طور پر نقصان دہ اشیا بشمول تمباکو، دیگر غیر صحت بخش مصنوعات اور ماحولیات کو نقصان پہنچانے والی اشیا پر ٹیکس بڑھانے کی تجویز دی ہے۔

اس کے علاوہ، ورلڈ بینک نے غریب اور کمزور گھرانوں پر ٹیکس کے کل بوجھ کو کم کرنے کے لیے توانائی کی مصنوعات، ٹیلی کمیونیکیشن، مالیاتی خدمات اور دیگر کی کھپت پر ذاتی انکم ٹیکس "ودہولڈنگ" چارجز کو ختم کرنے کا مطالبہ کیا ہے۔