عدالت کا بابر اعوان کا نام ای سی ایل سے نکالنےکا حکم

اسلام آباد ہائیکورٹ نے پاکستان تحریک انصاف کے رہنما اور سینیئر قانون دان بابر اعوان کا نام ایگزٹ کنٹرول لسٹ (ای سی ایل) سے نکالنے کا حکم دیتے ہوئے درخواست نمٹادی۔

اسلام آباد ہائیکورٹ کی جسٹس ثمن رفعت امتیاز نے بابراعوان کا نام ای سی ایل سے نکالنے کے لیے دائر درخواست پر سماعت کی۔

درخواست گزار بابر اعوان کی جانب سے وکیل صدر ہائیکورٹ بار ریاست علی آزاد عدالت میں پیش ہوئے۔

وکیل نے مؤقف اپنایا کہ میرے مؤکل کا نام ای سی ایل میں ڈال دیا گیا ہے، بابر اعوان کا نام ایگزٹ کنٹرول لسٹ سے نکالنے کا حکم دینے کی استدعا ہے۔

بعدازاں عدالت نے بابر اعوان کا نام ای سی ایل سے نکالنے کا حکم دیتے ہوئے درخواست نمٹادی۔

واضح رہے کہ 28 مارچ کو وفاقی کابینہ نے بابر اعوان کا نام ای سی ایل سے نکالنے کی منظوری دی تھی، وفاقی کابینہ نے وزارت داخلہ کی سمری سرکولیشن کے ذریعے منظور کرتے ہوئے 24 نام ای سی ایل میں ڈالنے کی اجازت بھی دے دی تھی۔