خضدار موٹر سائیکل بم دھماکہ میں دو افراد جاں بحق

خضدار :  خضدار کے علاقے عمر فاروق چوک میں بم دھماکے سے کم از کم دو افراد جاں بحق اور دیگر پانچ افراد زخمی ہوگئے۔

پولیس ذرائع کے مطابق بم موٹر سائیکل میں نصب کیا گیا تھا۔زخمیوں کو علاج معالجے کے لئے سول ہسپتال خضدار منتقل کردیا گیا ہے۔ادھر بلوچستان کے وزیراعلیٰ میر سرفراز احمد بگٹی نے بم دھماکے کی شدید مذمت کی ہے۔

ایک بیان میں انہوں نے کہا کہ بے گناہ افراد کو نشانہ بنانا ایک بزدلانہ اور غیر انسانی فعل ہے اور اس میں ملوث افراد کو ہر گز معاف نہیں کیا جائےگا۔وزیراعلیٰ بلوچستان  نے جاں بحق افراد کے اہل خانہ سے دلی تعزیت کا اظہار کیا اور متعلقہ حکام کو زخمیوں کے لئے بہترین طبی سہولتیں فراہم کرنے کی بھی ہدایت کی۔