ایرانی وزیر خارجہ سلامتی کونسل کے اجلاس میں شرکت کےلئے امریکہ جائیں گے

ایران کے وزیر خارجہ حسین امیر عبداللہیان اگلے ہفتے فلسطین ایشو پر ہونے والے سلامتی کونسل کے اجلاس میں شرکت کےلئے امریکہ جائیں گے۔

غیر ملکی خبر رساں ایجنسی کے مطابق ان کا یہ پچھلے 9 ماہ کے دوران تیسرا دورہ ہوگا۔ اقوام متحدہ میں ایرانی مشن نے بھی ان کی اس متوقع آمد کی تصدیق کر دی ہے۔

ان کا یہ دورہ مشرق وسطی میں پائی جانے والی کشیدگی بشمول اسرائیل کے دمشق میں ایرانی قونصل خانے پر ہونےوالے حالیہ حملے کے ماحول میں ایک غیر معمولی دورہ ہے۔ دمشق میں ایرانی قونصل خانے پر اسرائیلی حملے میں پاسداران انقلاب کے دو سینئیر کمانڈر بھی ہلاک ہو گئے تھے۔

ایران نے اسرائیلی حملے کا جواب دینے کا اعلان کر رکھا ہے۔ اس صورت حال میں خطے میں کشیدگی میں مزید اضافہ ہو چکا ہے۔ اور امریکہ اور اسرائیل دونوں نے امکانی ایرانی جواب کے لئے خود کو الرٹ پر رکھا ہوا ہے۔ تاہم امریکہ اسرائیلی حملے میں ملوث ہونے کی تردید کرتا ہے۔