پنجاب میں کورونا کے باعث بند کیے گئے مزارات کھولنے کا فیصلہ

تفصیلات کے مطابق کورونا کی صورتحال بہتر ہونے پر لاہور سمیت  پنجاب بھر میں مزارات کو ایک ماہ بعد زائرین کے لیے کھول دیا گیا۔محکمہ صحت پنجاب نے کیبنٹ کمیٹی برائےکورونا کی سفارشات پر صوبے میں مزارات کھولنے کا نوٹیفکیشن جاری کیا جس کے بعد لاہور میں حضرت داتا گنج بخش اور بی بی پاکدامن سمیت دیگر مزارات کو کھول دیا گیا ہے۔ پاکپتن میں حضرت بابا فرید الدین مسعود گنج شکر کا دربار بھی کھول دیا گیاہے ۔دربار کھلتے ہی عقیدت مندوں کی بڑی تعداد حاضری کےلیے پہنچ گئی۔ محکمہ اوقاف و مذہبی امور پنجاب کے تمام مزارات کو کرونا ایس او پیز پر عملدرآمد کروا کر کھولا جائیگا، تاکہ وائرس کے ممکنہ پھیلاؤ کو بھی روکا جا سکے۔

خیال رہے کہ محکمہ اوقاف کی جانب سے  پنجاب کے 547 مزارات 15 اپریل تک بند  کیے گئے تھے ۔

واضح  رہے  کہ   پنجاب حکومت  نے حالات میں بہتری  آنے  پر  حال ہی میں اسکول اور یونیورسٹیاں کھولنے کی اجازت دی ہے جس کے بعد اب مزارات  کو بھی  کھولنے   کی  اجازت  دے  دی گئی ہے۔