ڈہرکی ٹرین حادثہ : پاک آرمی اور رینجرز کے جوان جائے حادثہ پر پہنچ گئے

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق ٹرین حادثے کی جگہ  پر ریلیف اور ریسکیو کا کام جاری ہے۔آئی ایس پی آر کے مطابق پاک فوج اوررینجرز نےامدادی آپریشن کا آغازکر دیا۔   آئی ایس پی آر کاکہنا ہے کہ پاک فوج کےانجینئرزکی خصوصی ٹیم راولپنڈی سے ہیلی کاپٹرکےذریعے روانہ ہوئی، 2 ہیلی کاپٹرززخمیوں کی منتقلی کیلئےملتان سے جائےحادثہ  روانہ کردئیے گئے ہیں ۔ آرمی ہیلی کاپٹرز، انجینیئرز اور ڈاکٹرز ریلیف و ریسکیو کے کام میں مصروف ہیں۔

 واضح رہے کہ آج صبح  ڈہرکی  کے قریب دو ٹرینوں کے درمیان خوفناک حادثہ پیش آیا ہے۔ ملت ایکسپریس کراچی سے سرگودھا جبکہ سرسید ایکسپریس راولپنڈی سے کراچی جارہی تھی۔ حادثے کے بعد ملت ایکسپریس کی 8 اور سرسید ایکسپریس کی انجن سمیت 3 بوگیاں پٹری سے اتر گئیں، جبکہ کچھ بوگیاں کھائی میں جاگریں۔ ٹرینیں ٹکرانے سے کم از کم 30 مسافر جاں بحق جبکہ درجنوں زخمی ہو چکے ہیں۔