ایرانی صدر کی نماز جنازہ آج ادا کی جائے گی، شہباز شریف بھی شریک ہونگے

ہیلی کاپٹر حادثے میں جاں بحق ہونیوالے ایرانی صدر ابراہیم رئیسی اور دیگر کی نماز جنازہ آج تہران میں ادا کی جائے گی، وزیراعظم شہباز شریف نماز جنازہ میں شرکت کیلئے ایران روانہ ہوں گے۔

وزیراعظم آفس سے جاری بیان کے مطابق وزیراعظم شہباز شریف تہران میں نماز جنازہ میں شرکت کرنے کے لیے آج روانہ ہوں گے، جہاں دنیا بھر کے رہنماؤں کی شرکت متوقع ہے۔

سپریم لیڈر آیت اللہ خامنہ ای تہران میں ایرانی صدر ابراہیم رئیسی، وزیر خارجہ حسین امیر عبداللہیان اور دیگر کی نماز جنازہ ہ پڑھائیں گے۔ ابراہیم رئیسی کو مشہد میں جمعرات کو سپردخاک کیا جائے گا۔

گزشتہ روز ایران کے شہر قم میں بھی ایرانی صدر ابراہیم رئیسی اور ان کے ساتھیوں کی نماز جنازہ ادا کی گئی تھی۔

یادرہے کہ ایرانی صدر ابراہیم رئیسی کے ہیلی کاپٹر حادثے میں جاں بحق ہونے کے بعد نائب صدر محمد مخبر نے صدارتی ذمے داریاں سنبھال لیں ہیں، ایران میں باقاعدہ صدارتی انتخاب 28 جون کو ہوگا۔